Sápmelaččat bovdejuvvon Šloahta doaluide eanet go goassege ovdal

Dásseválddi presideanta Alexander Stubb bovdii iežas vuosttaš Šloahta doaluide 6.12.2024 sápmelaččaid eanet go goassege ovdal. Bovdejumiin oidno erenomážit presideanta Stubb eanagoddemátki Njuorggámii, Ohcejohkii, Anárii ja Avvilii miessemánus 2024.

Sámedikki sátnejođiheaddji Pirita Näkkäläjärvi muitala leat stuorra gudnin, ahte presideanta Alexander Stubb ja su guoibmi Suzanne Innes-Stubb háliideigga bovdet Šloahta doaluide ná ollu sámiid.

– Šloahta doalut lea Suoma okta eanemuš čuvvojuvvon dáhpáhusain, ja dan bokte boahtá oidnosii, makkár Suopma lea. Mađi eanet mii sámit oidnot doaluin, dađi buorebut boahtá ovdan dat, makkár Suopma duohtavuođas lea.

– Mun sávan, ahte mii bastit guođđit positiiva gova Sámis ja sápmelašvuođas, go mii ovddastit sámekultuvrra máŋggabealatvuođa, eallinfámu ja boahtteáigge jáhku, muitala Sámedikki sátnejođiheaddji Pirita Näkkäläjärvi.

Šloahta doaluid temán dán jagi lea Ovttas (Yhdessä). Presideantta šlohttii leat bovdejuvvon sullii 1 700 guossi iešguđet guovllus Suomas. Bovdejuvvon leat erenomážit olbmot, geat leat ovddidan searvvušlašvuođa ja buktán oktii olbmuid, geain leat iešguđegelágan duogážat.

Šloahta doaluide leat bovdejuvvon erenomáš olu sápmelaš badjeolbmot. Lassin Šloahta doaluid herskkot bohtet davvin, ja doaluin guossohit earret eará bohccobierggu, rievssahiid ja murjjiid.

– Fiinnis, ahte dásseválddi presideanta lea dán jagi addán fuomášumi min ealáhussii ja bovden mielde badjeolbmuid, geaiguin son deaivvadii Ohcejogas ja Anáris, iehčanasvuođabeaivve doaluide. Badjedilli lea okta sámeguovllu deháleamos ealáhusain ja sámeservošiin, mat barget boazoealáhusain, sámegielat ja kultuvra seilot nanusin, muitala badjeolmmoš Asko Länsman Gáldooaivvi bálgosis.

Sámemusea Siidda ovddasteaddjit leat bovdejuvvon vuosttaš geardde dásseválddi presideantta iehčanasvuođabeaivvi ávvudandilálašvuhtii. Sámemusea Siida bálkkašuvvui dán jagi Jagi eurohpalaš musea ja Jagi musea -bálkkašumiiguin.

– Mii illudit, ahte presideanta Alexander Stubb háliidii oahpásnuvvat Sámemusea ja luondduguovddáš Siidii ja sápmelaš kulturárbái virgemátkkistis Anárii miessemánus, muitaleaba sámemuseafoandda stivrra sátnejođiheaddji Veikko Feodoroff ja museahoavda Taina Máret Pieski.

Presideantta šloahtas lea Šloahta doaluid áigge oidnosis maiddái govvačájáhus Ovttas (Yhdessä), man lea čohkken ja válljen Suoma govvadáidaga musea. Okta čájáhusa govvejeddjiin lea sámedáiddár Lada Suomenrinne.

– Sámedáidda lea duođaid máŋggahámat ja oidnosis máilmmis. Munnje persovnnalaččat sámedáidaga dahkan mearkkaša friddjavuođa ja vejolašvuođa hukset molssaevttolaš máilmmiid. Lea dehálaš čájehit, ahte dáidagis ja kultuvrras lea mearkkašupmi, muitala dáiddár Lada Suomenrinne.

Dásseválddi presideanta lea mieđihan Sámedikki sátnejođiheaddji Pirita Näkkäläjärvii Suoma Ledjona I luohká riddármearkka beaivemeriin 6. juovlamánu 2024. Suoma riikkavuložiidda iehčanasvuođabeaivve mieđihuvvon gudnemearkkaid vuostáiváldit almmustahttojedje 3. juovlamánu.

Šloahta doaluide leat bovdejuvvon earret eará:

Pirita Näkkäläjärvi, sátnejođiheaddji, Suoma beali Sámediggi, Anár

Vesa Länsman, boazoisit, Gáldooaivvi bálggus ja guoibmi Marja Länsman, Ohcejohka

Asko Länsman, badjeolmmoš, Gáldooaivi bálggus ja guoibmi Anna Näkkäläjärvi-Länsman, Njuorggán

Niila Laiti, badjeolmmoš, Gáldooaivvi bálggus ja guoibmi Kati Eriksen, Ohcejohka

Tiina Salonen, fitnošeaddji, Aurora Holidays, ja guoibmi Mika Länsman, fitnošeaddji, Aurora Holidays Utsjoki

Leo Aikio, várreboazoisit, Muttošjávrri bálggus ja guoibmi Tiina Sanila-Aikio, Anár

Wille Feodoroff, boazoisit, Njávdáma bálggus ja guoibmi Anni Koivisto, Čeavetjávri

Laura Niittyvuopio-Valle, rektor ja guoibmi Tuomas Valle, Gáregasnjárga

Veikko Feodoroff, sámemuseafoandda stivrra sátnejođiheaddji, Sámemusea Siida ja guoibmi Satu Tuominen, Čeavetjávri

Taina Máret Pieski, museahoavda, doaibmajođiheaddji, Sámemusea Siida, Anár

Teija Kaartokallio, sátnejođiheaddji, Suoma Sámenuorat rs (SSN), Roavvenjárga

Gáddjá Haarla Pieski, dánsundáiddár, Ohcejohka

Biret Haarla Pieski, dánsundáiddár, Ohcejohka

Suvi West, filbmabagadalli ja guoibmi Anssi Kömi, Gáregasnjárga

Lassedieđut:

Pirita Näkkäläjärvi, sátnejođiheaddji, Sámediggi, 044 753 3766, pirita.nakkalajarvi@samediggi.fi

Asko Länsman, badjeolmmoš, Gáldooaivvi bálggus, +358400385898, asko@lumiporo.fi

Veikko Feodoroff, stivrra sátnejođiheaddji, Sámemuseafoanda, 0400 204 861

Taina Máret Pieski, museahoavda, Sámemusea Siida, 050 535 1574, taina.pieski@samimuseum.fi

Lada Suomenrinne, dáiddár, lada.suomenrinne@gmail.com