Valjâluvâttâllâmaašij nubástusuuccâmlävdikode saavâjođetteijee uásiáigásâš (20 %) virge

Valjâluvâttâllâmaašij nubástusuuccâmlävdikodde tuáimá Sämitige ooleest jiečânâssân já jiešráđálâžžân toimâorgaanin. Lävdikodde tuáimá vuossâmužžân nubástusuuccâmtäässin sämitiggelaavâ 26 §:st uáivildum valjâluvâttâlmân väldimân já tast meddâlistmân kyeskee aašijn.

Sämitige stivrâ lii iävtuttâm Sämitige čuákkimân 24.9.2026 nubástusuuccâmlävdikode saavâjođetteijee uásiáigásii virge vuáđudem. Ko lii vuáđudâm virge, te Sämitigge taha staatârááđán iävtuttâs nubástusuuccâmlävdikode saavâjođetteijee viirgán meridemnáál ulmust. Staatârääđi meerrid saavâjođetteijee viirgán tuáistáážân. Viirgán meridum olmooš aalgât virgeest nuuvt jotelávt ko máhđulâš staatârääđi miärádâs maŋa.

Sämitiggelaavâ 41 a § mield nubástusuuccâmlävdikode joođeet saavâjođetteijee. Saavâjođetteijee uásálist lävdikode toimâvááldán kullee nubástusuuccâmaašij kieđâvušmân já čuávdimân tievâsčuákkimist. Paargon kulá meid uásálistem nubástusuuccâmlävdikode tooimâ aalgâtmân já lävdikode pargo-oornig valmâštâlmân. Nubástusuuccâmlävdikode ornijduumeest, porgâmist já pargovievâst meriduvvoo tärhibeht nubástusuuccâmlävdikode pargo-oornigist, mon nubástusuuccâmlävdikode tievâsčuákkim nannee.

Asâttum tohálâšvuotâvátámâšah

Sämitiggelaavâ 41 b § 1 moomeent mield nubástusuuccâmlävdikode saavâjođetteijee kalga tevdiđ tuámustovlilaavâ 10 lovo 1 § 1 momentist asâttum tuámmár almolijd tohálâšvuotâvátámâšâid.

Viirgán meridemnáál ulmust váttoo:

• Suomâ aalmugjeessânvuotâ
• riehtitiettuu eres aaleeb ollâškovlâtođhos ko aalmugijkoskâsii já viärdádâllee riehtitiettuu maister tođhos
• rievtismielâlâšvuotâ
• tooleeb toimáin tuámustoovlist tâi eres tooimâst čujottum uápásmem virge toimâsuárgán
• tooimâ hoittáámân anoliih persovnliih jiešvuođah.

Kielâtáiđu

Virge suomâ- já ruotâkielâ tááiđun kyeskee tohálâšvuotâvátámâšah meriduvvojeh almossiärváduvâi pargein vattum kielâtááiđust adelum laavâ (424/2003) 6 § 1 moomeent mield. Occee kalga čäittiđ vattum suomâkielâ eromâš pyeri njálmálii já kirjálii tááiđu sehe tuđâttettee ruotâkielâ iberdem tááiđu asâttum vuovvijn.

Virge miänástuvvee hoittám ovdedeijee áánsuh

Virge miänástuvvee hoittám ovdedeh:

• sämikielâ táiđu
• sämikulttuur sehe Suomâ sämmilij kielâlii já kulttuurlii maaŋgânálásâšvuođâ tubdâm
• sämitiggelaavâ já sämitiggevaljáid kyeskee njuolgâdusâi tubdâm
• sämmilij vuáđulavâlii já aalmugijkoskâsâšriävtálii sajattâhân kyeskee äššitubdâmuš
• hárjánem sämitiggevaljáid tâi eres valjáid kyeskee nubástusuuccâmaašij kieđâvušmist teikâ eres västideijee hárjánem valjâ- tâi haldâttâhlaavâkiävtust
• uápásmem haldâttâhlaavâkiävtun, almosriähtán já nubástusuuccâmmonâttâlmáid
• hárjánem jiešráđálii laavâkevttimorgaan tâi eres maaŋgâ jeessân toimâorgaan porgâmist, čuávdustooimâst já eromâšávt čuávdusij vuáđustâlmist
• naavcah kieđâvuššâđ vättee aašijd jiečânávt, huolâlávt já pelettemeht
• šiev jođettem-, oovtâstpargo- já vuáruvaikuttâstááiđuh

Virgekoskâvuotâ já pargoäigi

Virge tiävdoo tuáistáážân. Virge lii uásiáigásâš, já ton fastâ pargoäigi lii 20 prosentid olesáigásii virge pargoääigist. Nubástusuuccâmlävdikode pargomeeri lii sierâlágán vaaljâi sierâ muddoin. Pargo vuáju eromâšávt valjâive nubástusuuccâmaašij kieđâvušmân. Pargoääigi meriáigásii lasseetmist puáhtá sooppâđ sierâ pargoi hoittáámist šaddee toimâlii táárbu já kevttimnáál orroo meriruuđâ já heiviittemnáál palvâluskoskâvuođâ iävtui mield.

Jiešráđálâšvuotâ já jeessânvuođâ estuuh

Nubástusuuccâmlävdikode saavâjođetteijee lii tuámuvääldi kevtidijn jiešráđálâš já tuáimá pargostis tuámmár ovdâsvástádâssáin.

Sämitiggelaavâ 41 b § mield taah ulmuuh iä paste kulluđ nubástusuuccâmlävdikoodán:

• Sämitige jeessân tâi värijeessân
• valjâlävdikode jeessân tâi värijeessân
• Sämitige palvâlusâst orroo olmooš.

Occee kalga viirgán uuccâm ooleest toimâttiđ almottâs sämitiggelaavâ 41 b §:st uáivildum čonâlâsvuođâid. Ovdil viirgán meridem toimâttuvvoo väljejum occee čonâlâsvuotâalmottâs riehtiministeriön já tiättun nubástusuuccâmlävdikoodán.

Virgepäikki, porgâmvyehi já pälkki

Saavâjođetteijee virge lii nubástusuuccâmlävdikode virge, já ton haaldâtliih toorjâpalvâlusah uárnejuvvojeh Anarist. Virge soijimsaje já porgâmsaje miärášumeprinsiipeh nannejuvvojeh sierâ.

Pälkki miärášuvá Sämitige pälkkivuáháduv vátávâšvuotâtääsi I mield. Olesáigásii virge vuáđupälkki lii 4 622,01 eurod mánuppaajeest. Lasseen máksojeh pargohárjánem mield miärášuvvee hárjánemlaseh já sämmilij päikkikuávlust porgâdijn 24 % sämikuávlu lase. Vuáđupälkki já laseh heiviittuvvojeh kuás-uv vyeimist orroo pargoäigiprosentân.

Uuccâm

Ucâmuš čujottuvvoo Sämitiigán. Uuccâmäigi álgá 15.9.2026 já nohá 15.10.2026 tme 16.15. Ucâmušân kalga lahteđ:

• rijjâhámásâš ucâmuš
• ánsuluvâttâllâm
• kopio tohálâšvuođâ čäittee tođhostuođâštusâst
• čielgiittâs pargo hoittám tááhust merhâšittee pargohárjánmist
• čielgiittâs suomâ- já ruotâkielâ tááiđust
• čielgiittâs sämikielâ tááiđust
• eres čielgiittâsah, maid occee haalijd kevttiđ jieijâs tohálâšvuođâ já áánsui árvuštâlmist
• sämitiggelaavâ 41 b § uáivildem almottâs čonâlâsvuođâin

Ucâmuš toimâttuvvoo meriääigi siste Sämitige kirjimkontturân šleđgâpostáin čujottâsân info@samediggi.fi

Anarist 11.9.2026
Sämitigge