Vaal-loǥstõkaaʹšši muuttâsooccâmluʹvddkååʹdd saaǥǥjååʹđteeʹj vueʹssäiggsaž (20 %) veʹrǧǧ

Vaal-loǥstõkaaʹšši muuttâsooccâmluʹvddkåʹdd tåimm Sääʹmteeʹǧǧ õhttvuõđâst jiõččniʹžžen da čõnnõõttʼteʹmes tåimmorgaanân. Luʹvddkåʹdd tåimm vuõssmõs muuttâsooccâmtääʹssen sääʹmteʹǧǧlääʹjj 26 §:st jurddum vaal-loǥstõʹǩǩe välddmõõžž da tõʹst meädda välddmõõžž kuõskki aaʹššin.

Sääʹmteeʹǧǧ halltõs lij eʹtǩǩääm Sääʹmteeʹǧǧ såbbra 24.9.2026 muuttâsooccâmluʹvddkååʹdd saaǥǥjååʹđteeʹj vueʹssäiggsa veeʹrj alttummuž. Altteen veeʹrj, Sääʹmteʹǧǧ tueʹjjad riikksuåvtõʹsse ehdtõõzz muuttâsooccâmluʹvddkååʹdd saaǥǥjååʹđteeʹj vergga mieʹrreem oummust. Riikksuåvtõs mieʹrrad saaǥǥjååʹđteeʹj vergga meäʹrteʹmes ääiʹj. Vergga mieʹrruum ooumaž alttad veeʹrjest vueiʹtlva sõrgg riikksuåvtõõzz tuʹmmstõõǥǥ mâŋŋa.

Sääʹmteʹǧǧlääʹjj 41 a § mieʹldd muuttâsooccâmluʹvddkååʹdd jååʹđat saaǥǥjååʹđteeʹjj. Saaǥǥjååʹđteeʹjj vuässââtt luʹvddkååʹdd tåimmväldda kuulli muuttâsooccâmaaʹšši ǩiõttʼtõõllmõʹšše da räʹtǩǩummša tiuddsåbbrest. Tuõjju kooll še vuässõõttmõš muuttâsooccâmluʹvddkååʹdd tåimmʼmõõžž jåttʼtummša da luʹvddkååʹdd tuâjjriâššmõõžž valmštõõllmõʹšše. Muuttâsooccâmluʹvddkååʹdd organisaatiost, tuâjast da tuâjjlažkååʹddest mieʹrreet tääʹrǩben muuttâsooccâmluʹvddkååʹdd tuâjjriâššmõõžžâst, koon muuttâsooccâmluʹvddkååʹdd tiuddsååbbar raavad.

Šiõttuum ââʹntemõõlǥtõõzz

Sääʹmteʹǧǧlääʹjj 41 b § 1 momeeʹnt mieʹldd muuttâsooccâmluʹvddkååʹdd saaǥǥjååʹđteeʹj âlgg tiuddeed suudišttâm 10 lååǥǥ 1 § 1 momeeʹntest šiõttuum suuʹdi aalmilaž ââʹntemõõlǥtõõzzid.

Vergga mieʹrreem oummust õõlǥtet:

• Lääʹdd meerlažvuõđ
• vuõiggâdvuõtt-tiõtti jeeʹres õllʼjab õllškooultuʹtǩǩõõzz mâta meeraikõskksaž da verddõõli vuõiggâdvuõtt-tiõtti maister tuʹtǩǩõõzz
• vuõiggmiõllsavuõđ
• ääiʹjbuin tåimmʼmõõžžin suudišttmest leʹbe jeeʹres tuâjast čuäʹjtum harjjnummuž veeʹrj tuâjjsuârgga
• tuâj håiddmõʹšše taarbšeei persoonlaž jiijjâsnallšemvuõđid.

Ǩiõlltäidd

Veeʹrj lääʹdd da ruõccǩiõl tääid kuõskki ââʹntemõõlǥtõõzz meäʹrtâʹvve õõlmâsõutstõõzzi tuâjjlažkååʹddest õõlǥtem ǩiõlltääidast uvddum lääʹjj (424/2003) 6 § 1 momeeʹnt meâldlânji. Ooʒʒjest feʹrttai čuäʹjted õõlǥtum lääʹddǩiõl samai pueʹrr njäälmlaž da ǩeerjlaž täidd di tååđteei ruõccǩiõl fiʹttjummuž täidd šiõttuum naaʹlin.

Veeʹrj oʹnnsteeʹjes håiddmõõžž oouʹdeei meriitt

Veeʹrj oʹnnsteeʹjes håiddmõõžž oouʹdee:

• sääʹmǩiõl täidd
• sääʹmkulttuur di Lääʹdd säʹmmlai ǩiõlʼlaž da kulttuursa määŋgnallšemvuõđ tobddmõš
• sääʹmteʹǧǧlääʹjj da sääʹmteʹǧǧvaalid kuõskki šiõttõõllmõõžž tobddmõš
• säʹmmlai vuâđđlääǥǥlaž da meeraikõskksažvuõiggâdvuõđla sââʹjj kuõskki ääʹšštobddmõš
• tobddmõš sääʹmteʹǧǧvaalid leʹbe jeeʹres vaalid kuõskki muuttâsooccâmaaʹšši ǩiõttʼtõõllmõõžžâst leʹbe jeeʹres vaʹstteei tobddmõš vaal- leʹbe vaaldâšmlääʹjjâânnmõõžžâst
• harjjnummuš vaaldâšmlääʹjjâânnmõʹšše, õõlmâsvuõiggâdvuõʹtte da muuttâsooccâm-mõõntõõllmõõžžid
• toobdâlm čõnnõõttʼteʹmes lääʹjjââʹnnemorgaan leʹbe jeeʹres määŋgvuäzlva tåimmorgaan tuâj tuejjummšest, räʹtǩǩeemtåimmjummšest da jeäʹrben räʹtǩǩummši vuâđõõttmõõžžâst
• odd ǩiõttʼtõõllâd õõlǥteei aaʹššid jiõččânji, tääʹrǩeld da krååʹma vueʹssbeäʹli siâzzmõõžž
• pueʹr jååʹđtem-, õhttsažtuâjj- da vuârrvaaiktemtääid

Veʹrǧǧkõskkvuõtt da tuâjjäiʹǧǧ

Veʹrǧǧ tiuddeet mieʹrteʹmes ääiʹj. Veʹrǧǧ lij vueʹssäiggsaž, da tõn põõšši tuâjjäiʹǧǧ lij 20 proseeʹnt tiuddäiggsa veeʹrj tuâjjääiʹjest. Muuttâsooccâmluʹvddkååʹdd tuâjjmieʹrr vaajtââll vaalkõõrv jeeʹres põõʹjin. Tuâjj teâddjââvv jeäʹrben vaaleeʹjj muuttâsooccâmaaʹšši ǩiõttʼtõõllmõʹšše. Tuâjjääiʹj mieʹrräiggsaž lââʹzztummšest vueiʹtet suåppâd jeeʹrab tuâjai håiddmõõžžâst šõddi tåimmamnallšem taarb da ââʹnnemnalla åårrai mieʹrrtieʹǧǧ da suåvldum kääzzkõskõskkvuõđi määinai meâldlânji.

Čõnnõõttʼteʹmesvuõtt da vuäzzlažvuõđ cõgldõõzz

Muuttâsooccâmluʹvddkååʹdd saaǥǥjååʹđteeʹjj lij suudâmvääʹld ââʹneen čõnnõõttʼtem da tåimm tuâjstes suuʹdi vasttõõzzin.

Sääʹmteʹǧǧlääʹjj 41 b § mieʹldd puõʹtti oummu jiâ vueiʹt kuullâd muuttâsooccâmluʹvddkådda:

• Sääʹmteeʹǧǧ vuäzzlaž leʹbe väärrvuäzzlaž
• vaal-luʹvddkååʹdd vuäzzlaž leʹbe väärrvuäzzlaž
• Sääʹmteeʹǧǧ kääzzkõsvuõđâst åårrai ooumaž.

Ooʒʒjest feʹrttai vergga ooccmõõžž õhttvuõđâst tååimted iʹlmmtõs sääʹmteʹǧǧlääʹjj 41 b §:st jurddum čõõnâsvuõđinâs. Ouddâl vergga mieʹrreem vaʹlljummšen šõddâm ooʒʒi čõõnâsvuõttiʹlmmtõs tååimtet vuõiggâdvuõttministeria da teâttan muuttâsooccâmluʹvddkådda.

Veʹrǧǧpäiʹǩǩ, tuâjjnääʹll da päʹlǩǩvuõtt

Veʹrǧǧpäiʹǩǩ lij Aanar. Tuâj vueiʹtet håiddad vuäzzas ougglõstuâjjan tuâjai luând da muuttâsooccâmluʹvddkååʹdd tuâj vueiʹtlvõsttum veeidasvuõđâst. Saaǥǥjååʹđteeʹj veʹrǧǧ lij muuttâsooccâmluʹvddkååʹdd veʹrǧǧ, da tõn vaaldšemvuõđla tuäʹrjjkääzzkõõzz jäʹrjstet Aanrest. Veeʹrj sâjjdâʹttempäiʹǩǩ da tuâjtuejjeem pääiʹǩ meäʹrtõõvvâmvuâđđjurddi raaveet jeeʹrab.

Päʹlǩǩvuõtt meäʹrtââvv Sääʹmteeʹǧǧ paʹlǩǩ-klassriâžldõõǥǥ väʹǯǯelvuõtt-tääʹzz I mieʹldd. Tiuddäiggsa veeʹrj vuâđđpäʹlǩǩ lij 4 622,01 euʹrred määnpââʹjest. Lââʹssen määuʹset tuâjjǩiõččlâsttmõõžž mieʹldd meäʹrtõõvvi ǩiõččlâʹsttemlââʹzz da sääʹm dommvuuʹdest tuâj tuejjeen 24 % proseeʹnt sääʹmvuuʹd lââʹss. Vuâđđpäʹlǩǩ da lââʹzz suåvtet kuäʹssaǥ viõǥǥâst åårrai tuâjjäiʹǧǧprosentta.

Ooccmõš

Ooccmõš čuäʹjtet Sääʹmtegga. Ooccâmäiʹǧǧ älgg 15.9.2026 da põõtt 15.10.2026 čiâss 16.15. Ooccmõʹšše âʹlǧǧe õhtteed:

• jiijjad maʹlle ǩeeʹrjtum ooccmõš
• tuâjjpäiʹǩǩloǥstõk
• kopio ââʹntemvuõđ čuäʹjtem tuʹtǩǩõstuõđštõõzzâst
• čiõlǥtõs tuâj håiddmõõžž beäʹlnn miârkteeinallšeʹmmen tuâjjǩiõččlâsttmõõžžâst
• čiõlǥtõs lääʹdd da ruõccǩiõl tääidast
• čiõlǥtõs sääʹmǩiõl tääidast
• jeeʹres čiõlǥtõõzz, koid oocci ǩeässââtt ââʹntemvuõđâs da meriitt ärvvtõõllmõõžžâst.
• sääʹmteʹǧǧlääʹjj 41 b § juʹrddem iʹlmmtõs čõnnõõttmõõžžin

Ooccmõõžž tååimtet mieʹrrääiʹjest Sääʹmteeʹǧǧ rekisterâʹsttemkonttra neʹttpååʹšt mieʹldd addrõʹsse info@samediggi.fi

Aanrest 15.9.2026
Sääʹmteʹǧǧ