Saavâjođetteijee Näkkäläjärvi lii maccâm vaanhimijriijâst

Sämitige saavâjođetteijee Pirita Näkkäläjärvi lii lamaš vaanhimijriijâst uđđâivemáánu 2025 rääjist. Ton ääigi nubbe värisaavâjođetteijee Tuomas Aslak Juuso lii toimâm saavâjođetteijee sajasâžžân.

– Mun halijdâm kijtteđ eromâšávt saavâjođetteijee sajasii Tuomas Aslak Juuso já vuossâmuu värisaavâjođetteijee Leo Aikio muu ovdâsvástádâsâi huolâmist ton puudâ, ko mun lijjim meddâl. Kijttoseh meid oles Sämitige stiivrân tehálii poolitlii pargoost jieškote-uvlágán fádáiguin taan räi taan valjâpaajeest, iätá saavâjođetteijee Näkkäläjärvi.

Saavâjođetteijee Näkkäläjärvi lâi mieldi muádi pargoääšist vaanhimijriijâs ääigi: uđđâ sämitiggelaavâ tuhhitmist ovdâskoddeest, president Stubb kolliimist Helsigist, sämmilij aalmugpeeivi tuáluin Anarist já europarlamiänttárij teivâdmist Suáluičielgist. Tääl sun kuittâg aalgât pargo olesáigásâžžân.

Ovdâskodde tuhhiittij sämitiggelahâoovdânpyehtim kesimáánust 2025. Kove: Lehtikuva / Markku Ulander.

– Mun ilodâm maccâđ pargoid vaanhimijriijâ maŋa. Vaanhimijrijjâ lii puáhtám uđđâ uáinuid elimân nuuvt olmožin, sämipolitikkárin ko meid jođetteijen, saavâjođetteijee Näkkäläjärvi iätá.

Sämitiggeest láá joođoost ennuv teháliih pargoh

– Mun halijdâm mainâšiđ muáddi ääši, moh láá eromâš pyereh máhđulâšvuođah pyerediđ sämmilij eellimtile Suomâst. Toh láá uđđâ sämitiggelaavâ oovtâsttoimâm- já ráđádâllâmkenigâsvuođâ (9 §) olášuttem, tuotâvuotâ- já sovâdâttâmkomissio tooimâi olášuttem já EU-aašij ovdedem, Näkkäläjärvi iätá.

Sämitige tááláš valjâpaje juátkoo ive 2027 räi. Suomâ ovdâskoddevaaljah láá taan Sämitige valjâpaje ääigi cuáŋuimáánust 2027.

– Sämitigge lii ráhtádâtmin ovdâskoddevaljáid já oovdedmin sämmilijd tehálijd tiädutmijd vaaljâi ohtâvuođâst, saavâjođetteijee Näkkäläjärvi iätá.

Lasetiäđuh:

Pirita Näkkäläjärvi
Saavâjođetteijee
044 753 3766
pirita.nakkalajarvi@samediggi.fi