Saaǥǥjååʹđteeʹjj Näkkäläjärvi lij mäccam puärrsiluõvâsvuõđâst
Sääʹmteeʹǧǧ saaǥǥjååʹđteeʹjj Pirita Näkkäläjärvi lij mäccam mååusat tuõjju puärrsiluõvâsvuõđâst mââibaarǥ 12.5.
Saaǥǥjååʹđteeʹjj Näkkäläjärvi leäi mieʹldd europarlamentaarniiʹǩǩi vueiʹnnlõõttmõõžžâst Suâlčiõʹljest pâʹsslašttâm-mannust 2026. Snimldõk: Renew Europe.
Sääʹmteeʹǧǧ saaǥǥjååʹđteeʹjj Pirita Näkkäläjärvi lij leämmaž puärrsiluõvâsvuõđâst ođđeeʹjjmannust 2025 vueʹljeeʹl. Tõn ääiʹj nuʹbb väärrsaaǥǥjååʹđteeʹjj Tuomas Aslak Juuso lij tåimmam saaǥǥjååʹđteeʹj sâjjsiʹžžen.
– Haaʹlääm späʹssbõõššâd jeäʹrben saaǥǥjååʹđteeʹj sâjjsa Tuomas Aslak Juuso da vuõssmõs väärrsaaǥǥjååʹđteeʹj Leo Aikio tuâjjan vasttõõzzi håiddmõõžžâst meädda ååreen. Späʹssbõõžž še Sääʹmteeʹǧǧ halltõõzz vuäzzlaid poliittlaž tuâjast jeeʹresnallšem aaʹšši mieʹldd tän räjja jååttam vaalpââʹj poodd, särnn saaǥǥjååʹđteeʹjj Näkkäläjärvi.
Saaǥǥjååʹđteeʹjj Näkkäläjärvi leäi mieʹldd mueʹdd vuâra tuâjjaaʹššin puärrsiluõvâsvuõđ poodd: ođđ sääʹmteʹǧǧlääʹjj priimmʼmõõžžâst eeʹttiǩ-kååʹddest, presideʹntt Stubb kuõʹssjempooddâst Heʹlssnest, säʹmmlai meersažpeeiʹv juuhlâst Aanrest da europarlamentaarniiʹǩǩi vueiʹnnlõõttmõõžžâst Suâlčiõʹljest. Ååʹn son kuuitâǥ alttad tiuddäiʹǧǧtuâj.
Eeʹttiǩ-kåʹdd priimi sääʹmteʹǧǧlääʹǩǩeʹtǩǩõõzz ǩieʹssmannust 2025. Snimldõk: Lehtikuva / Markku Ulander.
– Pueʹrr miõlin määccam tuõjju puärrsiluõvâsvuõđ mâŋŋa. Puärrsiluõvâsvuõtt lij põhttam ođđ ǩiõččâmvuõʹjjid jieʹllma nuʹt ooumžen, sääʹmpolitiikkneʹǩǩen ǥu jååʹđteeʹjen, saaǥǥjååʹđteeʹjj Näkkäläjärvi särnn.
Sääʹmteeʹǧǧest liâ tuâj vueʹlnn jiânnai vääžnai tuâj
– Haaʹlääm puʹhtted ouʹdde muäʹdd ääʹšš, koin liâ jiijjâsnallšem pueʹr vueiʹtlvažvuõđ pueʹreed säʹmmlai jieʹllemåårrmõõžžid Lääʹddjânnmest. Tõk liâ ođđ sääʹmteʹǧǧlääʹjj õhttsažtåimmam- da saǥstõõllâmõõlǥtõõzz (9 §) harjjnâttmõš, tuõttvuõtt-da suåvâdvuõttkomissio tååimai teâuddjâttmõš da EU-aaʹšši ooudummuš, Näkkäläjärvi särnn.
Sääʹmteeʹǧǧ ânnʼjõž vaalpââʹjj juätkkai eeʹjj poʹdde 2027. Lääʹddjânnam eeʹttiǩ-kåʹddvaal ââʹnet tän Sääʹmteeʹǧǧ vaalpââʹj poodd njuhččmannust 2027.
– Sääʹmteʹǧǧ lij valmštõõttmen eeʹttiǩ-kåʹddvaalid da ooudeʹmmen säʹmmlaid vääžnai prioriteeʹttid vaali õhttvuõđâst, saaǥǥjååʹđteeʹjj Näkkäläjärvi särnn.
Lââʹssteâđaid oudd:
Pirita Näkkäläjärvi
Saaǥǥjååʹđteeʹjj
044 753 3766
pirita.nakkalajarvi@samediggi.fi
