Sátnejođiheaddji Näkkäläjärvi lea máhccan vánhenfriijavuođas

Sámedikki sátnejođiheaddji Pirita Näkkäläjärvi leamašan vánhenfriijavuođas ođđajagimánu 2025 rájes. Dan áigge nubbi várresátnejođiheaddji Tuomas Aslak Juuso lea doaibman sátnejođiheaddji sadjásažžan.

– Hálidan giitit erenoamažit sátnejođiheaddji sadjásaš Tuomas Aslak Juuso ja vuosttas várresátnejođiheaddji Leo Aikio mu ovddasvástádusaid fuolaheames dan botta, go ledjen eret. Giitosat maiddái olles Sámedikki stivrii dehalaš politihkalaš barggus iešguđetlágan fáttáiguin dán rádjai dán válgabajis, dadjá sátnejođiheaddji Näkkäläjärvi.

Sátnejođiheaddji Näkkäläjärvi lei mielde moatte bargoáššis vánhenfriijavuođas áigge: ođđa sámediggelága dohkkeheamis riikkabeivviin, presideanta Stubb galledeamis Helssegis, sámi álbmotbeaivvi doaluin Anáris ja europarlamentarihkkáriid deaivvadeamis Suoločielggis. Dál son goittotge álggaha barggu ollesáigásaččat.

Riikkabeaivvit dohkkehedje sámediggeláhkaárvalusa geassemánus 2025. Govva: Lehtikuva / Markku Ulander.

– Illudan máhccat bargui vánhenfriijavuođa maŋŋá. Vánhenfriijavuohta lea buktán ođđa geahččanguovlluid eallimii nu olmmošin, sámepolitihkkárin go jođiheaddjin, sátnejođiheaddji Näkkäläjärvi dadjá.

Sámedikkis leat jođus olu dehalaš barggut

– Hálidan namuhit moadde ášši, mat leat erenoamaš buorre vejolašvuođat buoridit sámiid eallindiliid Suomas. Dat lea ođđa sámediggelága ovttasdoaibman- ja ráđđádallangeatnegasvuođa (9 §) ollašuhttin, duohtavuođa- ja soabadankomiššuvnna doaibmabijuid duohtandahkan ja EU-áššiid ovddideapmi, Näkkäläjärvi dadjá.

Sámedikki dálá válgabadji joatkašuvvá jagi 2027 rádjai. Suoma riikkabeaiválggat leat dán Sámedikki válgabaji áigge cuoŋománus 2027.

– Sámediggi lea ráhkkaneamen riikkabeaiválggaide ja ovddideamen sámiide dehalaš vuoruhemiid válggaid oktavuođas, sátnejođiheaddji Näkkäläjärvi dadjá.

Lassedieđut:

Pirita Näkkäläjärvi
Sátnejođiheaddji
044 753 3766
pirita.nakkalajarvi@samediggi.fi