AHR já Sämitigge uárnejii šoŋŋâdâhsymposium EU-riijkkâi tuámáráid
Alemus haldâttâhriehti já Sämitigge uárnejii oovtâstpargoost šoŋŋâdâhnubástus, pirâskoččâmušâid já eennâmkevttim sämikuávlust kieđâvuššee symposium EU-jeessânriijkkâi alemus haldâttâhtuámustovlij tuámáráid.
Kooveest čižetpeln Suomâ alemus haldâttâhrievti oovdânpyehteeräđiolmooš Pekka Kemppainen, Suomâ alemus haldâttâhrievti riehtiräđiolmooš Tuomas Kuokkanen, Suomâ alemus haldâttâhrievti president Kari Kuusiniemi, Sämitige saavâjođetteijee Pirita Näkkäläjärvi, Sämitige jeessân, mecciekolog Inka Musta, Laapi ollâopâttuv totkee, tuáhtár Anne-Maria Magga, Šoŋŋâdâhtiettuu lájádâs tutkâmušprofessor Hilppa Gregow, Italia aaleeb haldâttâhtuámustoovli tuámmár Marina Perrelli já Saaksa alemus haldâttâhtuámustoovli tuámmár Carsten Günther.
Anarist 26.5.2024 tollum tilálâšvuođâst savâstâllui luándu maaŋgâhámásâšvuođâ kiäppánem vaikuttâsâin sämmilij elimân já iäláttâssáid, sämmilâš puásuituálu eennâmkevttimân lohtâseijee laavâin já riehtiprinsiipijn sehe šoŋŋâdâhtooimâin arktâlâš kuávlust.
– Lii tehálâš toollâđ huksejeijee savâstâllâm syemmilâš já eurooplâš ohtsâškode kuávdášlâš tuáimeiguin. Mij tuáivup, ete mij puávtáččijm pyehtiđ EU-riijkkâi alemus haldâttâhtuámustovlijd vuáđulâš tiäđu sämmilij eellimvyevist, kuulmâ Suomâst ellee sämikielâst já puoh ärbivuáválâš iäláttâsâin, moi suojâlem já ovdedem lii algâaalmug sämmilij puátteevuođâ eellimiähtu, iätá Sämitige saavâjođetteijee Pirita Näkkäläjärvi.
Symposiumist sarnuu eereeb iärrás Sämitige jeessân mecciekolog Inka Musta, Laapi ollâopâttuv sämitotkee, tuáhtár Anne-Maria Magga, säämi šoŋŋâdâhrääđi jeessân, Šoŋŋâdâhtiettuu lájádâs tutkâmušprofessor Hilppa Gregow já Saaksa alemus haldâttâhtuámustoovli tuámmár Carsten Günther.
– EU alemus haldâttâhtuámustovlij seervi ACA-Europe, čuákkim ohtâvuođâst uárnejum symposium faalâi eromâš pyere tilálâšvuođâ vuáijuđ šoŋŋâduv, pirrâs já eennâmkevttim kyeskee teemaid eromâšávt Euroop union kuávlu áinoo algâaalmug uáinust, tiädut alemus haldâttâhrievti president Kari Kuusiniemi.
Symposium kyessin lijjii ACA-Europe jeessântuámustovlij presidenteh, saavâjođetteijeeh já tuámáreh, ohtsis suullân 60. Symposium lohtâs alemus haldâttâhrievti kyevtihásâš ACA-Europe-saavâjođetteijeepaje čuákkimij ohtâvuođâst uárnejum sierânâstilálâšvuođáid. ACA-Europe čuákkimeh jotkii Anarist 27.–28.5.2024 tollum seervi jeessânseminaaráin já almosčuákkimáin.
Lasetiäđuh:
Pirita Näkkäläjärvi
Sämitige saavâjođetteijee
044 753 3766
pirita.nakkalajarvi@samediggi.fi
