KHO da Sääʹmteʹǧǧ jäʹrjste äimmõs-symposium EU-jânnmi suuʹdid
Ââʹlmõs vaaldšemvuõiǥâs da Sääʹmteʹǧǧ jäʹrjste õhttsažtuâjast äimmõsmuttâz, pirrõskõõččmõõžžid da mäddâânnmõõžž sääʹmvuuʹdin ǩiõttʼtõõllâm symposiuum EU- vueʹssbieʹlljânnmi ââʹlmõs vaaldâšmsuudišttâm suuʹdid.
Snimldõõǥǥâst čiʹǯsbeäʹlnn Lääʹdd ââʹlmõs vaaldšemvuõiggâz čiõlǥteeʹjjduumšeǩ Pekka Kemppainen, Lääʹdd ââʹlmõs vaaldšemvuõiggâz vuõiǥâsduumšeǩ Tuomas Kuokkanen, Lääʹdd ââʹlmõs vaaldšemvuõiggâz presideʹntt Kari Kuusiniemi, Sääʹmteeʹǧǧ saaǥǥjååʹđteeʹjj Pirita Näkkäläjärvi, Sääʹmteeʹǧǧ vuäzzlaž, meäʹccekoloog Inka Musta, Lappi universiteeʹtt tuʹtǩǩeeʹjj, tohtor Anne-Maria Magga, Äimmtiõtti tuʹtǩǩeemprofessor Hilppa Gregow, Italia ââʹlmõs vaaldâšmsuudišttâm suʹvddi Marina Perrelli da Saksa ââʹlmõs vaaldâšmsuudišttâm suʹvddi Carsten Günther.
Aanrest 26.5.2024 õnnum pooddâst saǥstõʹlleš luâđ määŋghämmsažvuõđ ǩeeuʹhjõõvvmõõžž vaaiktõõzzin säʹmmlai jieʹllma da jieʹllemvuõʹjjid, sääʹm puäʒʒhååid mäddâânnmõʹšše õhttneei laaʹjjin da vuõiggâdvuõttjurddjin di äimmõstååimain aarktlaž vuuʹdest.
– Lij vääžnai jieʹlled raajjinallšem vuârrsaakkeem lääʹdd da eurooplaž õhttsažkååʹdd kõskksaž tåimmjivuiʹm. Tuäivvap, što põõstčim puʹhtted EU-jânnmi ââʹlmõs vaaldâšmsuudišttmid veâl pueʹrab teâđaid säʹmmlai jieʹllemnääʹlest, kooumâst Lääʹddjânnmest jieʹlli sääʹmǩiõlâst da pukin äʹrbbvuõđlaž jieʹllemvuõʹjjin, kooi suõjjlummuš da ooudâsviikkmõš lij alggmeer säʹmmlai pueʹttiääiʹj jieʹllem-mäinn, särnn Sääʹmteeʹǧǧ saaǥǥjååʹđteeʹjj Pirita Näkkäläjärvi.
Symposiumâst mainste jeäʹrbi mieʹldd Sääʹmteeʹǧǧ vuäzzlaž, meäʹccekoloog Inka Musta, Lappi universiteeʹtt sääʹmtuʹtǩǩeeʹjj, tohtor Anne-Maria Magga, sääʹm äimmõs-suåvtõõzz vuäzzlaž, Äimmtiõtti stroiʹttel tuʹtǩǩeemprofessor Hilppa Gregow da Saksa ââʹlmõs vaaldâšmsuudišttâm suʹvddi Carsten Günther.
– EU ââʹlmõs vaaldâšmsuudišttâm õhttõõzz, ACA-Europen, såbbar õhttvuõđâst jäʹrjstem symposium taʹrjjii pueʹrmõs poodd čiŋlmõõvvâd äimmõõzz, pirrõõzz da mäddâânnmõõžž kuõskki teeʹmid jeäʹrben Euroopp unioon vuuʹd tåʹlǩ åårrai alggmeer ǩiõččâmvueʹjjest, teäʹddad ââʹlmõs vaaldšemvuõiggâz presideʹntt Kari Kuusiniemi.
Symposium kueʹssen leʹjje ACA-Europen vueʹssbieʹllsuudišttâm presideeʹnt, saaǥǥjååʹđteeʹj da suuʹdi, õhttsiʹžže nuʹt-aa 60. Symposium õhttan ââʹlmõs vaaldšemvuõiggâz kueiʹtekksaž ACA-Europe-saaǥǥjååʹđteeʹjjpââʹj såbbri õhttvuõđâst jäʹrjstem pååđpooddid. ACA-Europen såbbar juätkkje Aanrest 27.–28.5.2024 õnnum õhttõõzz vueʹssbieʹllseminaarin da õõlmâs-såbbrin.
Lââʹssteâđ:
Pirita Näkkäläjärvi
Sääʹmteeʹǧǧ saaǥǥjååʹđteeʹjj
044 7533 766
pirita.nakkalajarvi@samediggi.fi
