AHR ja Sámediggi ordnejedje dálkkádatsymposia EU-riikkaid duopmáriidda
Alimus hálddahusriekti ja Sámediggi ordnejedje ovttasráđiid dálkkádatnuppástusa, birasgažaldagaid ja eanangeavaheami sámeguovlluin gieđahalli symposia EU-lahttoriikkaid alimus hálddahusduopmostuoluid duopmáriidda.
Govas gurut bealde Suoma alimus hálddahusrievtti áššemeannudeaddji ráđđeolmmoš Pekka Kemppainen, Suoma hálddahusrievtti alimusriekteduopmár Tuomas Kuokkanen, Suoma alimus hálddahusrievtti presideanta Kari Kuusiniemi, Sámedikki ságajođiheaddji Pirita Näkkäläjärvi, Sámedikki lahttu, vuovdeekologa Inka Musta, Lappi universitehta dutki, doavttir Anne-Maria Magga, Dálkediehtaga lágádusa dutkanprofessor Hilppa Gregow, Italia alit hálddahusduopmostuolu duopmár Marina Perrelli ja Tuiskka alimus hálddahusduopmostuolu duopmár Carsten Günther.
Anáris 26.5.2024 dollojuvvon dilálašvuođas ságastallojuvvui luonddu máŋggahámatvuođa geahppáneami váikkuhusain sámiid eallimii ja ealáhusaide, sápmelaš boazodoalu eanangeavaheapmái gullevaš lágain ja vuoigatvuođaprinsihpain ja maid dálkkádatdoaimmain árktalaš guovllus.
– Lea dehálaš geavvat ovddideaddji ságastallama suopmelaš ja eurohpalaš servodaga guovddáš doibmiiguin. Mii sávvat, ahte sáhtášeimmet buktit EU-riikkaid alimus hálddahusduopmostuoluide vuđolaš dieđuid sápmelaš eallinvuogis, golmma suomas ealli sámegielas ja buot min árbevirolaš ealáhusain, maid suodjaleapmi ja ovddideapmi lea eamiálbmot sámiid boahttevuođa eallineaktu, dadjá Sámedikki ságajođiheaddji Pirita Näkkäläjärvi.
Symposias hálle earret eará Sámedikki lahttu vuovdeekologa Inka Musta, Lappi universitehta sámedutki, doavttir Anne-Maria Magga, sámi dálkkádatráđi lahttu, Dálkediehtaga lágádusa dutkanprofessor Hilppa Gregow ja Tuiskka alimus hálddahusduopmostuolu duopmár Carsten Günther.
– EU alimus hálddahusduopmostuoluid searvvi, ACA-Europe, čoahkkima oktavuođas lágiduvvon symposia fálai erenoamáš dilálašvuođa čiekŋut dálkkádaga, birrasa ja eanangeavaheami guoski temáide erenoamážit Eurohpá Uniovnna guovllu áidna eamiálbmoga geahččanguovllus, deattuha alimus hálddahusrievtti presideanta Kari Kuusiniemi.
Symposia guossin ledje ACA-Europe lahttoduopmostuoluid presideanttat, ságajođiheaddjit ja duopmárat, oktiibuot sullii 60. Symposia laktása alimus hálddahusrievtti guovtti jagát ACA-Europe-ságajođihanbaji čoahkkimiid oktavuođas ordnejuvvon sierradilálašvuođaide. ACA-Europe čoahkkimat joatkašuvve Anáris 27.–28.5.2024 dollojuvvon searvvi lahttoseminárain ja oktasaščoahkkimiin.
Loga dáppe AHR presideanta Kari Kuusiniemi eaŋgalsgielat sáhkavuoru symposias.
Lassedieđut:
Pirita Näkkäläjärvi
Sámedikki ságajođiheaddji
044 753 3766
pirita.nakkalajarvi@samediggi.fi
