Almoot uáppee sämikielâi káidusmáttááttâs luuhâmihán 2022–2023 majemustáá 31.3. – káidusoppâtijmijd puáhtá puáttiđ uápásmuđ jo tääl!
Almoot uáppee sämikielâi káidusmáttááttâs piiloothaavâ máttááttâsân luuhâmihán 2022–2023 majemustáá 31.3. Almottâttâm máttááttâsân tahhoo Hellewi-almottâttâmvuáháduvâst. Almottâttâm kuáská uđđâ uáppeid já uáppeid, kiäh juátkih haavâ máttááttâsâst. Almottâttâm puáhtá toohâđ máttááttâs uárnejeijee, rehtor tâi huolâtteijee.
Káidusmáttááttâshaahâ fáálá sämikielâ (anarâš-, nuorttâlâš- tâi orjâlâškielâ) vuáđumáttááttâs tâi luvâttâhškovlim tievâsmittee sämikielâ máttááttâs 2 okkotijme sämiuáppeid, kiäh láá sämmilij päikkikuávlu ulguubeln. Meid ovdâmáttááttâs uáppeeh pyehtih uásálistiđ haavâ máttááttâsân. Sämikielâ ij taarbâš mättiđ ovdiist vâi puáhtá uásálistiđ máttááttâsân.
Almottâttâmääigi nuuhâm maŋa máttááttâsân uásálistmist ráđádâleh vistig uáppee päikkikieldáin. Máttááttâsjuávhuh ráhtojeh jieškote-uv sämikielân sierâ nuuvt, ete uáppei luokkâ- já kielâtääsi sehe luuhâmoornig váldojeh huámmášumán nuuvt pyereest ko máhđulâš.
Oppâtijmijd puáhtá puáttiđ uápásmuđ jo tääl
Jis uáppee já huolâtteijeeh láá perustum sämikielâ oppâmist káidusohtâvuođâ peht, mutâ oppâtijmijd uásálistem smietâdit tâi jiärástut, te tijmijd puáhtá puáttiđ uápásmuđ ovdil almottâttâm já sämikielâ máttááttâs algâttem.
– Tiervâpuáttim kiiđâ ääigi uápásmuđ! Uápásmum ääigi uáppee já huolâtteijee finnejeh vuossâmuid feerimijd tast, ete maggaar sämikielâ oppâm káidusin ličij, movtijdit káidushaavâ tavesämikielâ máttáátteijee Máren-Elle Länsman.
Uáppeeh já huolâtteijeeh, kiäh halijdeh uápásmuđ káidusoppâtijmijd, pyehtih leđe ohtâvuođâst káidushaavâ sämikielâ máttáátteijeid tâi hahâpargeid.
Lasetiäđuh:
Anni-Sofia Niittyvuopio, hahâhovdâ
Ucjuv kieldâ
anni-sofia.niittyvuopio@edu.utsjoki.fi
040 7012 094
Arla Magga, hahâkoordinaattor
Sämitigge
arla.magga@samediggi.fi
040 6875 989
Lasetiäđuh Sämikielâi káidusmáttááttâs piiloothaavâst:
Sämikielâi káidusmáttááttâs piiloothaahâ lii haahâ, mon Ucjuv kieldâ joođeet já Sämitigge koordinist, já mii juátkoo 2023 kiđđâluuhâmpaje loopâ räi. Máttááttâs- já kulttuurministeriö ruttâd haavâ. Ton ulmen lii faallâđ sämikielâ káidusmáttááttâs kyehti okkotijme verd vuáđuškoovlâ já nube tääsi uáppeid sämmilij päikkikuávlu ulguubel.
