Almmut oahppi sámegielaid gáiddusoahpahussii lohkanjahkái 2022–2023 maŋimustá 31.3. – oahppodiimmuide oažžu oahpásnuvvat juo dál!
Almmut oahppi Sámegielaid gáiddusoahpahusa pilohttafitnu oahpahussii lohkanjahkái 2022–2023 maŋimustá 31.3. Almmuheapmi oahpahussii dahkkojuvvo Hellewi-almmuhanvuogádagas. Almmuheapmi guoská sihke ođđa ohppiid ja daid ohppiid, geat jotket fitnu oahpahusas. Almmuheami sáhttá dahkat oahpahusa lágideaddji, rektor dahje oahppi fuolaheaddji.
Gáiddusoahpahusfidnu fállá sámegiela (anáraš-, nuortalaš-, dahje davvisámegiela) vuođđooahpahusa dahje logahatskuvlejumi dievasmahtti sámegiela oahpahusa 2 vd sámeohppiide, geat orrot sámiid ruovttuguovllu gielddaid olggobealde. Maiddái ovdaoahpahusa oahppit sáhttet oassálastit fitnu oahpahussii. Sámegiela ii dárbbaš vel máhttit, vai sáhttá oassálastit oahpahussii.
Almmuhanáiggi maŋŋel fidnu ráđđádallá vuos oahpahusa ordnejeddjiin oahpahusa fállamis. Oahppit juhkkojuvvojit sámegiela, agi ja gielalaš dási mielde oahpahusjoavkkuide ja nu, ahte dat váldet ohppiid lohkanortnegiid vuhtii nu bures go vejolaš. Oahpahus lágiduvvo gielain ja joavkkuin, main leat unnimustá guokte oahppi dahje studeantta.
Oahppodiimmuide oažžu oahpásnuvvat juo dál
Jos oahppi ja fuolaheaddjit leat beroštuvvan sámegiela gáiddusoahpahusas, muhto oahppodiimmuide oassálastin orru menddo gelddolaš, de oahppodiimmuide oažžu boahtit oahpásnuvvat ovdal almmuheami dahje oahpahusa álggaheami borgemánus.
– Bures boahtin giđa áigge oahpásnuvvat oahppodiibmui! Oahpásnuvvamis oahppi ja fuolaheaddjit besset vásihit ovddalgihtii, mo sámegiela studeren orolii, rávve sámegielaid gáiddusoahpahusfitnu davvisámegiela oahpaheaddji Máren-Elle Länsman.
Oahppit ja fuolaheaddjit, geat háliidit oahpásnuvvat gáiddusoahppodiibmui, sáhttet váldit oktavuođa gáiddusfitnu sámegiela oahpaheddjiide dahje fidnobargi guoktái.
Lassedieđut:
Anni-Sofia Niittyvuopio, fidnohoavda
Ohcejoga gielda
anni-sofia.niittyvuopio@edu.utsjoki.fi
040 701 2094
Arla Magga, fidnokoordináhtor
Sámediggi
arla.magga@samediggi.fi
040 687 5989
Lassedieđut Sámegielaid gáiddusoahpahusfitnu birra:
Sámegielaid gáiddusoahpahusa pilohttafitnu jođiha Ohcejoga gielda ja koordinere Sámediggi. Fidnu joatkašuvvá gitta jagi 2023 giđđalohkanbaji lohppii, ja dan ruhtada oahpahus- ja kulturministeriija. Fitnu mihttomearrin lea fállat sámegielaid gáiddusoahpahusa vuođđoskuvlla ohppiide ja nuppi dási studeanttaide sámeguovllu gielddaid olggobeallái guokte vahkkodiimmu.
