Anarâšaašij ráđádâllâmkode vuáđudem vuávájui savâstâllâmtilálâšvuođâst
Sämitige jesânáid uárnejui savâstâllâmtilálâšvuotâ anarâšaašij ráđádâllâmkode vuáđđudmist. Ráđádâllâmkode pargon lii ovdediđ anarâšsiärvus ovdedem já väldiđ siärváduv aktiivlubbooht uássin Sämitige tooimâ.
Sämitigge lii asâttâm ohtân tehálumos toimân ive 2018 valmâštâlškyettiđ anarâšaašij ráđádâllâmkode vuáđudem tienuuvt, ete ton čuákánpiejâm já toimâkove liččii meridum raamiráđádâlmij räi.
– Tilálâšvuođâst mij savâstâlâim anarâššáid kyeskee äigikyevdilis aašijn já vuáváim ráđádâllâmkode toimâkove sehe čuákánpiejâm, muštâl tilálâšvuođâ čuákán koččom Sämitige I värisaavâjođetteijee Heikki Paltto.
Lii tárguttâs, ete ráđádâllâmkodde toimâškuát máhđulâšvuođâi mield jo 2018 teikâ majemustáá 2019 nuuvt, ete tot puávtáččij tuárjuđ meid tuotâvuotâ- já sovâdâttâmproosees, tave-eennâmlii sämisopâmuš kieđâvuššâm sehe eres joođoost orroo lahâhaavâid, moh kyeskih sämmiláid.
Ráđádâllâmkode vuáđudem ovdán čuávuvâžžân Sämitige stiivrâ čuákkimân.
Sämitige jesânijn tilálâšvuotân uásálistii Heikki Paltto, Neeta Jääskö, Kari Kyrö, Kirsti Kustula, Jouni Aikio já Anu Avaskari (kooveest čižetpeln uálgispel).
Lahtoseh
Lasetiäđuh:
Sämitige I värisaavâjođetteijee, Heikki Paltto, puh. 040 756 9075, heikki.paltto(at)samediggi.fi
Saavâjođetteijee išedeijee Inka Saara Arttijeff, 050 574 7629, inka-saara.arttijeff(at)samediggi.fi
