Cloubi-digimateriaalvuáđu ávus kevttimškovlim kesimáánust
Sämitigge já Arktisâš pedagogiik II -haahâ orniv Cloubi-digimateriaalvuáđu kevttimškovlim kesimáánu ääigi. Škovlim lii áávus puoh digimateriaal rähtimist kiddiistum paijeel 15-ihásáid.
Cloubi-materiaal tuáimá meid tablettist. Kove: Petra Kuuva.
Cloubi lii tááláš oppâmateriaalvuáđu, mon kevttih eres lasseen oppâmateriaalkuástideijeeh. Sämikielâlii máttááttâs várás Cloubin lii puovtâdum ovdâmerkkân historjá já ohtsâškoddeoopâ Forum-materiaal já eenikielâ Virkkuuvääri-särji. Ávus digimateriaalijd puáhtá uápásmuđ täst Avoimet digimateriaalit.
Škovliimáin kejâstâh puátteevuotân
Škovlim lii šiev tilálâšvuotâ uápásmuđ digimateriaal puovtâdmân já finniđ feerim digimateriaal rähtimist.
– Škovlim addel máhđulâšvuođâ keččâliđ, magarin digimateriaal rähtim tobdoo já ličij-uvks tast máhđulávt ävkki nuoráid puátteevuođâst. Mij halijdep faallâđ meid mielâkiddiivâš porgâm kiäsán. Uásálisteeh pyehtih keččâliđ vuáđu máhđulâšvuođâid já rähtiđ jieijâs materiaalijd veikkâ ubâ keesi, iätá Sämitige oppâmateriaalčällee Piäkkáá Heeihâ Petra.
Škovlim leehâst máhđulâšvuođâid sämikielâlii oppâmateriaalpargon
Sämitige škovlim- já oppâmateriaaltoimâttâh puovtâd ain eenâb já eenâb digitaallii oppâmateriaal. Sämitigge tuáivu, et sämikielâlii oppâmateriaalpargon finnip lase rähteid. Digitaallii mättim lasseen oppâmateriaalpuovtâdem taarbâš eres lasseen kovesárgoid já teevstâi lohheid.
Uásálistem škovliimân já Cloubist toimâm luhostuvá šievnáálá táválii tiäturáin já pyeri internet-ohtâvuođáin. Cloubi-pirrâdâh tuáimá laađđâmist, ađai tom ij taarbâš luođiđ jieijâs tiätturân. Táválâš puállupeevdijn já säpligáin piergee pyereest.
Škovlim lii suomâkielân Google Hangout-heiviittâs peht čuávuvávt:
- Škovlim 1: 14.6.2021 tme 14:00 – 16:00
- Škovlim 2: 21.6.2021 tme 14:00 – 16:00
- Škovlim 3: 28.6.2021 tme 14:00 – 16:00
- Oovdânpyehtim: 09.8.2021 tme 14:00 – 16:00.
Oovdânpyehtim maŋa materiaaleh almostuveh Cloubist ávus digimateriaalin rähtei luvvijn.
Almottât jieijâd škovliimân 10.6.2021 räi Webropol-luámáttuv peht: https://link.webropolsurveys.com/S/DDD1F784299E0043
Lasetiäđuh:
Petra Kuuva
Oppâmateriaalčällee
040 677 22 75
petra.kuuva@samediggi.fi
Sämitigge
Unni Länsman
Proojeekthovdâ, Arktisâš pedagogiik II -haahâ
050 502 1357
unni.lansman@sogsakk.fi
Säämi máttááttâskuávdáš
Liiŋkah:
Sämitige škovlim- já oppâmateriaaltoimâttâh
Koulutus ja oppimateriaali – Samediggi
Arktisâš pedagogiik II, sämimáttááttâs digiviärmádâh -haahâ
www.sogsakk.fi/arktistapedagogiikkaa2
