Eennâmtuálu algâpyevtittem uđâsmittum koskâpuddâsâš toorjâ lii uuccâmnáál skammâmáánu 4. peeivi rääjist

Staatârääđi meridij eennâmtuálu algâpyevtittem koskâpuddâsii torjuu uđđâ kriterijn roovvâdmáánu 29. peeivi. Torjuu puáhtá uđâsmitmij mield čuosâttiđ eenâb algâpyevtittem finnoduvváid, moh láá kierdâm koronaviruspandemiast. Torjuu uuccâm uđâsmittum iävtuiguin lekkâs skammâmáánu 4. peeivi. Torjuu uuccâm juátkoo mudoi siämmáánáál ko taan räi.

Eennâmtuálu algâpyevtittem toorjâ lii uáivildum syergi finnoduvváid, moh láá njuolgist kierdâm koronaviruspandemiast. Tágáreh láá ovdâmerkkân tagareh spesiaališum puásuitááluh, moh vyebdih pyevtittâsâid njuolgist raavvâdviäsoid tâi eres uásteid já kiäi pyevtittâsâi uástu lii nuuhâm tâi merhâšitteht kiäppánâm pandemia tiet.

Staatârääđi meridij alediđ eennâmtuálu algâpyevtittem finnodâhkuáhtásii torjuu alemus rääji 10 000 eurost 80 000 euron. Torjuu vyelirääji vyeleduvvoo 5 000 eurost 2 000 euron. Staatârääđi meridij juátkiđ torjuu vyeimistorroomääigi 30.6.2021 räi.

Torjuu puáhtá uđâsmittum kriterij vuáđuld mieđettiđ pyevtittâsellei tiervâsvuođâ ja finnodâhtooimâ juátkim turvim várás velttidmettum fuođârij hahâmân. Eres investistmáid tâi pyevtittâspiäjusij hahâmân iä mieđeet torjuu.

”Sämitigge ana torjuu alemuu rääji aledem, torjuu vyeimistorroomääigi juátkim já velttidmettum fuođârij haahâm tuárjum šiev uđâsmitmin. Veikâ Sämitige iävtuttâs poccuupiärgu kiluhade vuállánmist šoddâm táápui sajanmäksimist ij lekken asâttâsâst valdum huámmášumán, te tohhum uđâsmitmeh láá käibidum puárádâsah puásuituállei ekonomâlii tilán”, iätá Sämitige saavâjođetteijee Tuomas Aslak Juuso.

“Sämitigge iävtuttij asâttâshammiittâsâst adelum ciälkkámušâstis, ete torjuu vyelirääji vyelediččii   5 000 eurost 2 000 euron, vâi torjuu vyelirääji ličij pyerebeht koskâvuođâst puásuituállei puáđutáásán já vyelirääji ličij oovtviärdásâš sierâ iäláttâsâi kooskâ. Ovdâmerkkân kyelituálu kulá almos kolotorjuu pirrâdâhân, mon vyelirääji lii 2 000 eurod. Lii pyeri já eromâš taarbâšlâš, ete Sämitige iävtuttâs vyelirääji vyeleedmist uáinoo tääl asâttâsâst”, paahud Sämitige iäláttâsčällee Sarita Kämäräinen.

Eennâm- já meccituáluministeriö tiäđáttâs 29.10.2020

Sämitige ciälkkámuš staatârääđi asâttâshammiittâsâst eennâmtuálu algâpyevtittem finnoduvâi koskâpuddâsii torjust adelum staatârääđi asâttâs nubásmitmist

Lasetiäđuh:

Saavâjođetteijee Tuomas Aslak Juuso puh. 040 687 3394 / 010 839 3101, tuomas.juuso(at)samediggi.fi

II värisaavâjođetteijee Leo Aikio puh. 040 621 6505 / 010 839 3180, leo.aikio(at)samediggi.fi

Iäláttâsčällee Sarita Kämäräinen puh. 040 186 7258 / 010 839 3143, sarita.kamarainen(at)samediggi.fi

Kove: Tomi Guttorm