Leo Aikio anarâšaašij ráđádâllâmkode saavâjođetteijen
Anarâšaašij ráđádâllâmkode saavâjođetteijen väljejui Leo Aikio já värisaavâjođetteijen Aslak Pekkala. Ráđádâllâmkodde čokkânij majebaargâ 8.12.2020. Čuákkimist kieđâvuššii ráđádâllâmkode ornijdum lasseen Sämitige toimâohjelm 2020-2023 uulmijd anarâšâi uáinust sehe sämmilij tuotâvuotâ- já sovâdâttâmproosees.
Ráđádâllâmkodde savâstâllii čuákkimist Sämitige toimâohjelm 2020-2023 uulmijn anarâšâi uáinust já eromâšávt savâstâlmijn poođij oovdân säämi kielâlaavâ olášum anarâškielâ uásild. Čuákkim meid kieđâvušâi äigikyevdilis kejâstuv sämmilij tuotâvuotâ- já sovâdâttâmprosesist já ráđádâllâmkodde puovtij oovdân, ete anarâšâi já anarâškielâlij sajattâh váldoo huámmášumán.
– Anarâšaašij ráđádâllâmkodde lii uđđâ toimâorgaan Sämitiggeest já lii tergâd, ete mij peessâp ráđádâllâmkode pargoost aalgân. Ulmen lii, ete ráđádâllâmkodde čokkân táárbu mield já oovded äigikyevdilijd aašijd, moh kyeskih anarâššáid, iätá ráđádâllâmkode saavâjođetteijee já Sämitige II värisaavâjođetteijee Leo Aikio.
Sämitige čuákkim 1/2020 asâttij anarâšaašij ráđádâllâmkode toimâpajan 2020-2023. Ráđádâllâmkoodán nomâttui Leo Aikio, Aslak Pekkala, Asko Länsman, Inka Kangasniemi, Anu Avaskari ja Anni Koivisto. Ráđádâllâmkode tárguttâssân lii ovdediđ anarâšâi aašijd já sajattuv.
Ráđádâllâmkode pargon lii adeliđ ciälkkámušâid Sämitige stiivrân já lävdikuddijd anarâššáid kyeskee aašijn, čuávvuđ anarâššáid kyeskee aašij ovdánem, toimâđ äššitobden anarâššáid kyeskee aašijn sehe toohâđ iävtuttâsâid anarâššáid kyeskee koččâmušâin.
Kove: Ville-Riiko Fofonoff
Lasetiäđuh:
Sämitige II värisaavâjođetteijee Leo Aikio puh. 040 621 6505 / 010 839 3180, leo.aikio(at)samediggi.fi
Viestâdemčällee Johanna Alatorvinen puh. 010 839 3140 / 040 663 4493, johanna.alatorvinen(at)samediggi.fi
