Luosâpivdemraijiittâsâid liččii kolgâm ráđádâllâđ ollásávt vuoigâlâžžân
Suomâ já Taažâ soppii cuáŋuimáánust Tiänu luosâ pivdemkiäldust pivdopaajeest 2021. Taažâ stuorrâtigge lii 25.5.2021 meridâm, ete keesih pivdopaje 2021 ruákkiviermi kiäldu maassâd Finnmark riddokuávlust. Sämitigge ij ane miärádâs vuoigâlâžžân tiileest, mast Tiänu kuávlu sämmilijn lii kieldum joba luosâpivdo päikkitáárbun.
– Mij lep lamaš ohtâvuođâst eennâm- já meccituáluministeriön já táttum čielgiittâs Taažâ miärádâsâst. Suomâ ličij kolgâm huolâttiđ ráđádâlmijn Taažáin tast, ete pivdoraijiittâsah nuuvt Tiänust ko meid merâkuávluin liččii ollásávt vuoigâliih. Taažâ miärádâs vaaigut merhâšitteht sämmilij feerimân vuoigâlâšvuođâst, ko Tiänu kuávlu ulmuin kieldii luosâpivdo oleskiäldu mield máhđulâšvuođâ ubâ päikkitárbupiivdon, já tääl kuittâg raččoh raijiittâstooimâid merâkuávlust, iätá I värisaavâjođetteijee Anni Koivisto.
– Taažâ miärádâs vaaigut negatiivlávt sehe Tiänu já Njiävđám luosân. Luosâpivdemteedâ Njiävđámjuv njäälmist stuáru miärádâs mield merhâšitteht já tot lii uhke Njiävđámjuv luosânáálán. Taažâ miärádâs lii hirmâd pettâšume, juátká Sämitige II värisaavâjođetteijee Leo Aikio.
Ráđádâlmijn Suomâ já Taažâ kooskâ soppii cuáŋuimáánust, ete raijimkuávlun kuleh Tiänujuv váldu-uáli, Tiänu uálgijuuvah, Tiänuvuonâ sehe merâkuávlu vuonâ ovdiibeln vijđes neelji kieldâ stuárusii kuávlust. Kiäldu kuáská sehe luosâ stággupiivdon já luosâpiivdon njáŋguviermijn. Tiänu luosâpivdo oleskiäldu láá vuáđustâllâm toin, ete rávhuiduttem kuáská oles kuávlun, mast luosâ tääl kodeh.
Sämitigge lii ovdil tieđettâm, ete tot ij kyeddit Tiänu luosâpivdo oleskiäldu. Sämitigge oonij tehálâžžân, ete räijejeh luosâpivdo taan pivdopaje. Raijiittâsâid liččii kuittâg kolgâm čuoccâđ piivdon, mii ij naavdâš vuáđulaavâ já aalmugijkoskâsij sopâmušâi syeje.
Raijiittâsâi tuáváást lii Tiänu luosânaalij hiäjusmum tile. Tiänu čuávvum- já tutkâmjuávkku almostitij algâivveest raapoort Tiänu luosânaalij tiileest ive 2020.
Lasetiäđuh:
Anni Koivisto
I värisaavâjođetteijee
040 415 5969
anni.koivisto@samediggi.fi
Leo Aikio
II värisaavâjođetteijee
040 621 6505
leo.aikio@samediggi.fi
