Sämitigge almoot uuccâmnáál pargoviehâhoovdâ virge

Sämitigge lii suulân 75 pargee ornijdume, mon pargeeh tuáimih maaŋgâpiälásávt sierâlágán pargoin já sierâ ovdâsvástádâssuorgijn. Sämitigge lii ohtâ merhâšittee pargoadeleijee sämmilij päikkikuávlust. Sämitige pargei váldutoimâpäikki lii Säämi kulttuurkuávdáš Sajos Anarist, mutâ pargeeh pargeh vijđáht miätá Suomâ já sämikuávlu.

Pargoviehâhoovdâ pargoh láá luvâttâllum Sämitige pargo-oornig 26 g §:st. Pargoviehâhoovdâ pargon lii ei. västidiđ Sämitiggeest puohâin palvâluskoskâvuođâ áigásijn pargoviehâhaldâttuv prosesijn rekrytistmist ain pargokoskâvuođâ nuuhâm räi. Pargoviehâhovdâ tuárju oles pargovievâ puoh aašijn, moh lohtâseh palvâluskoskâvuotân já pargopyereestvajemân, västid pargoviehâstrategia já -ravvui sehe miärádâsâi rähtimist já olášutmist. Pargoviehâhovdâ tuáimá hoovdâi pargopaarrân, eromâšávt suu ovdâsvástádâsâst láá ääših, moh lohtâseh pargoviehâhaldâttâhân, pargopyereestvajemân já pargoadeleijeepolitiikân. Toos lasseen pargoviehâhovdâ tuáimá pälkkihaldâttuv já pargotiervâsvuođâhuolâttâs ohtâvuotâolmožin. Pargoviehâhovdâ tuáimá almos toimâttuvâst haldâttâhhoovdâ vuálásâžžân.

Tohálâšvuođâiähtun lii tooimâ vaattâm hiäivulâš aaleeb ollâškovlâtođhos já sämikielâ máttu (asâttâs 1727/95). Pargo miänástuvvee hoittáámist iššeed vijđes sämikulttuur tubdâm, pargohárjánem pargoviehâhaldâttuv já pargopyereestvaijeem oovdedmist, tiettim keevâtlijn palvâluskoskâvuotâaašijn, virgeolmoošlaavâ já staatâ virgeiähtusopâmuš eromâš heivitmist sehe šiev ráđádâllâm-, tiimipargo- já viestâdemtááiđuh. Toos lasseen hiättun annoo oovtâstpargo ovdedeijee já čuávdusân viggee pargovyehi sehe naavcah kieđâvuššâđ maaŋgâid sierâlágán pargoid ovdâsvástádâslávt korrâ-uv tedduu vyelni.

Pargoviehâhoovdâ pälkki miärášuvá Sämitige pälkkivuáháduv vátávâšvuotâtääsi IV/I miäldásávt (vuáđupälkki 2986,12 €).  Vuáđupäälhi lasseen pargoost máksojeh 24 % sämikuávlu lase sämmilij päikkikuávlust porgâdijn já pargohárjánem mield miärášuvvee hárjánemlaseh. Tooimâst nuávditteh kuuđâ mánuppaje keččâlemääigi.

Uuccâmreeivâ sehe máhđulâš ánsuluvâttâllâm já eres lahtosijd kalga macâttiđ Sämitige čäällimkoodán 29.2.2024 räi taan uuccâmluámáttuv peht (lekkâs uđđâ laasân).

Lasetiäđuid pargoost addel haldâttâhhovdâ Pia Ruotsala-Kangasniemi puh 010 839 3106.

Sämitige tooimân puáhtá uápásmuđ nettičujottâsâst www.samediggi.fi.

Anarist 29.1.2024

Sämitigge