Saavâjođetteijee Näkkäläjärvi toolâi saavâ OA almosčuákkimsalist algâaalmugij maailmkonferens 10 ive tooimâ juhleest

Kove: UNDESA / Ronja Pörhö

– Lii hirmâd suotâs, ete algâaalmugij maailmkonferens 10 ive toimâ ávudui návt fiijnâ tilálâšvuođáin mávsulii saajeest, saavâjođetteijee Näkkäläjärvi iätá.

Juhletilálâšvuođâst lijjii saavah OA ovdâsteijein, OA algâaalmugorgaanij ovdâsteijein, OA jeessânstaatâin já maailm algâaalmugij čiččâm sosiokulttuurlii kuávlu ovdâsteijein. Arktâsii kuávlu saavâ toolâi Säämi parlamentaarlii räädi já Suomâ Sämitige saavâjođetteijee Pirita Näkkäläjärvi.

Saavâjođetteijee Näkkäläjärvi pajedij savâstis oovdân äigikyevdilis fáádá algâaalmugij vuoigâdvuođâi sierânâsjiešvuovijn já tai suoijâlmist. Taan saajeest juhleaalmug adelij spontanijd aplodijd.

– Algâaalmugij vuoigâdvuođah láá luánduliih já sierânâs, ige mii vuoigâdvuođâid uážu hiäjusmittiđ siävutmáin taid ij-riävtáláid termáid tego páihálâšseervih tâi -juávhuh, eeđâi saavâjođetteijee Näkkäläjärvi.

Saavâjođetteijee Näkkäläjärvi eeđâi savâstis, ete termâ algâaalmugeh ana sistees áinoošlajâsii historjá, kulttuur já vuoigâdvuođâid, maid ij uážu ovtâstittiđ tâi siävuttiđ eres juávhoid.

– Aldanemvyevi, mii vuáđuduvá sierânâsjiešvuovvijd, kalga kunnijâttiđ algâaalmugij vuoigâdvuođâi olášutmist, vâi puáhtá visásmittiđ, ete vuoigâdvuođah suojâluvvojeh, paijeentuállojeh já ovdeduvvojeh kompromisijttáá.

Luuvâ oles saavâ eŋgâlâskielân tääbbin. Tilálâšvuođâ puáhtá keččâđ tääbbin.

OA algâaalmugij pisovâš foorum já Säämi parlamentaarlâš rääđi

OA algâaalmugij pisovâš foorum (UNPFII) lii ive 2000 vuáđudum OA ekonomia- já sosiaalrääđi (Economic and Social Council, ECOSOC) vuálásâš raavâadeleijee toimâorgaan, moos kuleh 16 jiečânâs äššitobdeejesânid. Haldâttâsah nomâtteh käävci jesânid já algâaalmugeh käävci jesânid. Foorum kieđâvuš algâaalmugáid kyeskee koččâmušâid eromâšávt ekonomâlii já sosiaallii ovdánem, kulttuur, pirâskoččâmušâi, škovlim, tiervâsvuođâ já olmoošvuoigâdvuođâi syergist. Pisovâš foorum čokkân ohtii ivveest OA váldusaajeest New Yorkist.

Säämi parlamentaarlâš rääđi (SPR) lii Suomâ, Taažâ já Ruotâ Sämitiigij já Ruošâ sämmilij parlamentaarlâš oovtâstpargo-orgaan. Ruošâ sämiseervih uásálisteh oovtâstpaargon tárkkojeijen SPR:st. Taažâ, Ruotâ já Suomâ Sämitigeh jođetteh rääđi 16 mánuppaje poojijn. SPR pargon lii ovdediđ Sämitiigij koskâsii oovtâstpargo sehe kieđâvuššâđ aašijd, moh kyeskih teikâ pyehtih kuoskâđ sämmiláid maaŋgâ enâmist teikâ sämmiláid aalmugin. SPR oovdâst Suomâ, Ruotâ já Taažâ sämmilijd tave-eennâmlijn já aalmugijkoskâsijn ohtâvuođâin.

Lasetiäđuh:
Pirita Näkkäläjärvi
Saavâjođetteijee
044 753 3766
pirita.nakkalajarvi@samediggi.fi

Inka-Saara Arttijeff
Aalmugijkoskâsij aašij čällee
050 574 7629 / 010 839 3198
inka-saara.arttijeff@samediggi.fi