Saaǥǥjååʹđteei Näkkäläjärvi õõʹni saakkvuâr ÕM tiuddsååbbarpääiʹǩest alggmeerai maaiʹlmkonfereeʹns 10-eeʹǩǩjuuʹhlest

Snimldõk: UNDESA / Ronja Pörhö

– Âânam čuuʹt fijnnân, što alggmeerai maaiʹlmkonfereeʹns 10-eeʹǩǩjuuʹhl joohljõʹtte nääiʹt fijnnâs pooddin ärvvsaž pääiʹǩest, saaǥǥjååʹđteei Näkkäläjärvi särnn.

Juʹhllpooddâst kuʹlleš saakkvuâraid ÕM eeʹttkõʹsttjin,  ÕM alggmeertoiʹmmjeeʹji  eeʹttkõʹsttjin, ÕM vuäzzlažriikkin di maaiʹlm alggmeerai čiččmest sosiokulttuurlaž vuuʹd eeʹttkõʹsttjin. Aarktlaž vuuʹd saakkvuâr õõʹni Sääʹm parlamentaarlaž suåvtõõzz da Lääʹdd sääʹmteeʹǧǧ saaǥǥjååʹđteei Pirita Näkkäläjärvi.

Saaǥǥjååʹđteei Näkkäläjärvi kaaggi saakkvuârstes õuʹdde ääiʹjpoddsaž ääʹšš alggmeerai vuõiggâdvuõđi jiiʹjjesnallšemvuõđin da tõi suõjjlummšest. Tät päiʹǩǩ saakkvuârast vuäǯǯai spontaan aploodid juuʹhlʼjõʹttjin.

– Alggmeerai vuõiggâdvuõđ lie luândlaž da pååđ, mij vuõiggâdvuõđid ij vuäǯǯ rââʹžžeed sieʹjjteeʹl tõiʹd ij-vuõiǥõõzzlaž teeʹrmid mâʹte pääiklažõutstõõzz leʹbe -joouk, säärnai saaǥǥjååʹđteei Näkkäläjärvi.

Saaǥǥjååʹđteei Näkkäläjärvi säärnai saakkvuârstes, što teʹrmm alggmeer âânn seʹst jiiʹjjesnallšem historia, kulttuur da vuõiggâdvuõđid, koid ij vuäǯǯ õhtteed leʹbe sieʹjjted jeeʹres jooukivuiʹm.

– Jiiʹjjesnallšemvuõʹtte vuâđđneei âlddnemnääʹl âlgg ciʹsttjed alggmeerai vuõiggâdvuõđi tiuʹddepiijjmõõžžâst, što vueiʹtet ainsmâʹtted, što vuõiggâdvuõđid suõjjlet, tuõʹllʼjet da viiǥǥât ooudårra kompromiissitaa.

Looǥǥ saakkvuâr obbnes eŋgglõsǩiõʹlle tääiǥ. Šõddmõõžž vuäitt ǩiõččâd tääiǥ.

ÕM alggmeerai põõšši foorum da Sääʹm parlamentaarlaž suåvtõs

ÕM alggmeerai põõšši foorum (UNPFII) lij eeʹjj 2000 vuâđđuum ÕM tällõs- da sosiaalsuåvtõõzz (Economic and Social Council, ECOSOC) vuâllsaž raʹvvjeei toiʹmmjeei, koozz koʹlle 16 jiõččnaž äʹšštobddivuäzzliʹžžed. Halltõõzz nõõmte kääuʹc vuäzzliʹžžed da alggmeer kääuʹc vuäzzliʹžžed. Foorum ǩiõttʼtââll alggmeeraid kuõskki kõõččmõõžžid jeäʹrben tällõõzzlaž da sosiaalʼlaž õuddnem, kulttuur, pirrõskõõččmõõžži, škooultõõzz, tiõrvâsvuõđ da ooumažvuõiggâdvuõđi sueʹrjest. Põõšši foorum noorââtt išttma õʹhttešt eeʹjjest ÕM väʹlddpääiʹǩest New Yorkist.

Sääʹm parlamentaarlaž suåvtõs (SPS) lij Lääʹdd, Taarr da Ruõcc Sääʹmtiiʹǧǧi kõskksaž parlamentaarlaž õhttsažtuâjjtoiʹmmjeei. Ruõšš sääʹmorganisaatio vuässâʹtte õhttsažtuõjju taʹrǩstõõllʼjen SPS:st. Taarr, Ruõcc da Lääʹdd Sääʹmteeʹǧǧ jååʹđte suåvtõõzz 16 määnpââʹj põõʹjin. SPS tuâjjan lij õõuʹdeed Sääʹmtiiʹǧǧi kõskksaž õhttsažtuâj di ǩiõttʼtõõllâd aaʹššid, kook kueʹsǩǩe leʹbe vuäiʹtte kuõskkâd säʹmmlaid määŋg riikkâst leʹbe säʹmmlaid meeran. SPS eeʹttkâstt Lääʹdd, Ruõcc da Taar säʹmmlaid tâʹvvjânnmallaš da meeraikõskksaž õhttvuõđin.

Lââʹssteâđ:
Pirita Näkkäläjärvi
Saaǥǥjååʹđteei
044 753 3766
pirita.nakkalajarvi@samediggi.fi

Inka Saara Arttijeff
Meeraikõskksaž aaʹšši piisar
050 574 7629 / 010 839 3198
inka-saara.arttijeff@samediggi.fi