Ságajođiheaddji Näkkäläjärvi doalai sáhkavuoru ON:id dievasčoahkkinsáles eamiálbmogiid máilmmikonferánssa 10 jagi doaimma ávvudeamis

Govva: UNDESA / Ronja Pörhö

–  Lea fiinnis, ahte eamiálbmogiid máilmmikonferánssa 10 jagi doaimma ávvudeapmi dollojuvvui ná fiinna dilálašvuohtan mávssolaš sajis, ságajođiheaddji Näkkäläjärvi dadjá.

Ávvudilálašvuođas gullojedje ON:id ovddasteaddjiid, ON:id eamiálbmotorgánaid ovddasteaddjiid, ON:id láhttostáhtaid ja maid máilmmi eamiálbmogiid čieža sosiokultuvrralaš guovllu ovddasteaddjiid sáhkavuorut. Árktalaš guovllu sáhkavuoru doalai Sámi parlamentáralaš ráđi ja Suoma Sámedikki ságajođiheaddji Pirita Näkkäläjärvi.

Ságajođiheaddji Näkkäläjärvi ovdanbuvttii sáhkavuorustis áigeguovdilis fáttá eamiálbmogiid vuoigatvuođaid sierraiešvuođain ja daid suodjaleamis. Dát oassi sáhkavuorus bovttii ávvudilálašvuođa gehččiid speažžut gieđaid spontánalaččat.

–  Eamiálbmogiid vuoigatvuođat leat lunddolaččat ja sierra, iige min vuoigatvuođaid oaččo heajudit sehkkemiin daid tearpmaide, mat eai leat vuoigatvuođalaččat dego báikkálašservošat dahje -joavkkut, dajai ságajođiheaddji Näkkäläjärvi.

Ságajođiheaddji Näkkäläjärvi dajai sáhkavuorustis, ahte tearpma eamiálbmogat sisttisdoallá áidnalunddot historjjá, kultuvrra ja vuoigatvuođaid, maid ii oaččo ovttastahttit dahje sehkket eará joavkkuide.

–  Erenoamášvuhtii vuođđuduvvi lahkonanvuogi galgá gudnejahttit eamiálbmogiid vuoigatvuođaid ollašuhttimis, vai sáhttá sihkkarastit, ahte vuoigatvuođat suodjaluvvojit, doalahuvvojit ja ovddiduvvojit gaskaneassosoahpamušaid haga.

Loga olles sáhkavuoru eaŋgalasgillii dás. Dilálašvuođa sáhttá geahččat dás.

ON:id eamiálbmogiid bissovaš forum ja Sámi parlamentáralaš ráđđi

ON:id eamiálbmogiid bissovaš forum (UNPFII) lea jagis 2000 vuođđuduvvon ON:id ekonomiija- ja sosiálaráđi (Economic and Social Council, ECOSOC) vuolde doaibmi ráđđeaddi doaibmaorgána, masa gullet 16 iehčanas áššedovdilahtu. Stivrrat nammadit gávcci lahtu ja eamiálbmogat gávcci lahtu. Forum gieđahallá eamiálbmogiid áššiid erenoamážit ekonomalaš ja sosiálalaš ovdáneami, kultuvrra, birasgažaldagaid, skuvlejumi, dearvvašvuođa ja olmmošvuoigatvuođaid guovllus. Bissovaš forum čoahkkana oktii jagis ON:id váldoguovddážis New Yorkas.

Sámi parlamentáralaš ráđđi (SPR) lea Suoma, Norgga ja Ruoŧa sámedikkiid gaskasaš parlamentáralaš ovttasbargoorgána. Ruošša sámeorganisašuvnnat oassálaste ovttasbargui áicin SPR:s. Norgga, Ruoŧa ja Suoma sámedikkit jođihit ráđi 16 mánu bajiin. SPR doaibman lea ovddidit sámedikkiid gaskasaš ovttasbarggu ja gieđahallat áššiid, mat gusket dahje sáhttet guoskat sámiid máŋgga riikkas dahje sámiid álbmogin. SPR ovddasta Suoma, Ruoŧa ja Norgga sámiid davviriikkalaš ja riikkaidgaskasaš oktavuođain.

Lassedieđut:
Pirita Näkkäläjärvi
Ságajođiheaddji
044 753 3766
pirita.nakkalajarvi@samediggi.fi

Inka Saara Arttijeff
Riikkaidgaskasaš áššiid čálli
050 574 7629 / 010 839 3198
inka-saara.arttijeff@samediggi.fi