Sämikielâi máttáátteijeeuáppeeh hárjuttâllii vuossâmuu tove káidusohtâvuođâiguin – ”Mun oskom, ete taan feerimist lii ävkki puátteevuođâst”

Puátteeh sämikielâi máttáátteijeeh láá vuossâmuu tove čođâldittâm uási máttááttâshárjuttâlmist káidusohtâvuođâiguin Sämikielâi káidusmáttááttâs piiloothaavâst. Máttááttâshárjuttâlleeh láá lamaš anarâš-, nuorttâlâš- ja tavesämikielâst. Máttááttâshárjuttâlmeh láá uási Oulu ollâopâttuv Ketterä ollâškovlâ -haavâ, mast škuávlejuvvojeh sämikielâliih amnâsmáttáátteijeeh.

Máttááttâshárjuttâlmist uáppeeh láá uápásmâm káidusmáttááttâs pedagogiikân já didaktiikân já meid jieŋâlmittám jieijâs mättim digitaallij máttááttâsniävui kevttimist. Máttáátteijeeuáppeeh láá čuávvum káidusoppâtiijmijd já sij láá meid toollâm tiijmijd. Máttátmân sij láá finnim torjuu já stivrim káidushaavâ máttáátteijein.  – Máttááttâshárjuttâllâm ääigi lam oppâm meid jieš, ko hárjuttâlleeh láá kiävttám sierâlágán digitaallijd ohjelmijd máttááttâsâst, illood stivrejeijee máttáátteijee Satu Pieski.

– Káidusmáttááttâs lii puátteevuođâ máttááttâsvyehi, muštâl Sämikielâi káidusmáttááttâshaavâ proojeekthovdâ Hanna Helander.  – Lii suotâs, ete mij lep pastam faallâđ uđđâ sämikielâ máttáátteijeid máhđulâšvuođâ uápásmuđ káidusmáttááttâsân já ton keevâtlijd peelijd jo sii oppâmuddoost. Káidusmáttááttâsân uápásmem lii tehálâš puátteid máttáátteijeid.

Meid Ketterä ollâškovlâ -haavâ koordinaattor Tiina Mattanen ana, ete oovtâstpargo lii luhostum já tehálâš. – Movtijdittee macâttâs lii puáttám sehe hárjuttâllein já stivrejeijen. Mun lam ilolâš tast, ete mij lep peessâm keččâliđ uđđâ vuovijd olášuttiđ máttááttâshárjuttâlmijd.

Puátteš tavesämikielâ máttáátteijee Máren-Elle Länsman lii tuđâvâš, ko peesâi  hárjuttâllâđ káidusmáttááttâsâst. – Mun halijdim peessâđ uáiniđ já keččâliđ jieš, ete maht puáhtá máttááttiđ káidusin. Lâi meid suotâs hárjuttâllâđ taggaar stivrejeijein, kote lii jo kuhheeb ääigi máttááttâm káidusin. Mun oskom, ete taan feerimist lii ävkki meid puátteevuođâst.

Sämikielâi káidusmáttááttâshaavâst máttáátteh taan luuhâmive 17 ovdâ- já vuáđumáttááttâsjuávkkud já kulmâ luvâttâhjuávhu anarâš-, nuorttâlâš- já tavesämikielân. Ketterä ollâškovlâ -haavâst láá ohtsis lovmat máttáátteijeeuáppee, já sii pedagoogliih uápuh pišteh taan ive loopâ räi. Škovlimhaavâ škovliimeh olášuttojeh Oulu ollâopâttuv Giellagas-instituut, šoddâdemtiettui tieđâkode já Säämi máttááttâskuávdáá oovtâstpargon. Kuohtuid haavâid ruttâd Máttááttâs- já kulttuurministeriö.

Lasetiäđuh:

Sämikielâi káidusmáttááttâs piiloothaahâ
Hanna Helander                                 
hanna.helander(at)edu.utsjoki.fi         
040 701 2094                                    

Ketterä ollâškovlâ -haahâ
Tiina Mattanen
tiina.mattanen(at)oulu.fi  
029 4483 451

Sämikielâi káidusmáttááttâs piiloothaahâ
Unna-Maari Pulska 
unna.pulska(at)samediggi.fi 
040 614 5549