Sämikielâlii rijjâäigitooimâ nuoráid uárnejeijee De! 2 -haavâ toimâ lii álgám
Sämitige já sämikuávlu kieldâi ohtsâš De! 2 -haavâ lii algâttâm tooimâs.
Kove: Ville Fofonoff
Haavâ pargen lii väljejum Vuáčust vuálgus šoddâdemtiettui kandidat Anni Saara Aikio. Proojeektpargee pargon lii sämikielâlii- já kulttuurmiäldásii nuorâipargo ovdedem sämikuávlu kieldâin hahâvuávám mield oovtâst Sämitige nuorâiraađijn já haavâ stivrimjuávhoin.
– Pargo oroi uáli mielâkiddiivâžžân. Munjin lii tehálâš, et säminuoráid uárnejuvvojeh tooimah jieijâs kielân, sehe jieijâs kulttuurân vuáđuduvvee tooimah. Lii tehálâš sehe nanodiđ säminuorâi uásálâšvuođâ já meid nanodiđ säminuorâi identitet já kulâvâšvuođâ tobdo. Mun halijdâm leđe fáárust oovdedmin säminuorâi rijjâääigi tooimâid, muštâl Anni Saara Aikio.
Anni Saara Aikio.
Haavâ toimâ uárnejuvvoo säminuorâi tuoivui vuáđuld. Ijâttes ijjâ -festivaal ääigi piäijoo joton koijâdâllâm, mii kärttee nuorâi tuoivuid sämikielâlii rijjâäigitooimâ várás. Haahâ lii fáárust Ijâttes ijjâ -festivaalist ubâ oholoopâ, hahâpargee puáhtá teivâđ Sämitige nuorâirääđi nuorâi láávust 16.–17.8.2024 tme 17.30–20.30. Koijâdâlmân puáhtá västidiđ meid 8.9.2024 räi Ijâttes iijâst almostuvvee nettiluámáttuv peht. De! 2 -haavâ uárnejeijeeh tuáivuh-uv, et koijâdâlmân västidiččii nuuvt maaŋgâs säminuorâin ko máhđulâš, vâi mij pastep orniđ nuoráid mielâmield toimâm pirrâ sämikuávlu.
De! 2 -haahâ lâi mieldi Vuáču Laapi markkânijn 10.8.2024 párnái- já nuorâiláávu kulen. Láávust puovtij rähtiđ raddemeerhâid, uápásmuđ haahân já Sämitige nuorâirääđi tooimân. Päärnih já nuorah pessii meid keččâliđ njuárustem.
Haavâ tooimâ puáhtá čuávvuđ sosiallii mediast haavâ Instagram-siijđoin, @de_astoaiggedoaibma. Tooimâst tieđettuvvoo meid nuorâirääđi sosiallijn mediain.
De! 2 – sämikielâlii nuorâipargo ovdedem sämikuávlu kieldâin -haahâ oovded sämikielâlii já -kulttuur miäldásii nuorâipargo sämikuávlu kieldâin. Haavâ oovtâstpargokyeimin sämikuávlu kieldâi lasseen láá Sämikuávlu máttááttâskuávdáš já Nuorâikuávdáš Vasatokka. Sämitige nuorâirääđi lii finnim nuorâipargo ovdedemhaavâ várás 46 500 € ruttâdem Laapi kuávluhaldâttâhvirgáduvâst. Haahâ pištá ive 2024 loopân.
Luuvâ lase De! 2 -haavâst tääbbin.
Lasetiäđuh:
Anni SaaraAikio
De! 2 -haahâ proojeektpargee
anni-saara.aikio@samediggi.fi
puh. 044 901 3500
