De! 2 -haʹŋǩǩõõzz tåimmjummuš jåttai
Sääʹmteeʹǧǧ da sääʹmvuuʹd kooʹddi De! 2 -haʹŋǩǩõs lij alttääm tåimmjummšes.
Haʹŋǩǩõõzz tåimmjummuš jäʹrjstet sääʹmnuõri tuõivvji vuâđâld. Snimldõk: Ville Fofonoff.
Haʹŋǩǩõõzz tuâjjliʹžžen lij vaʹlljuum Vuâčč ååraž pedagogiikk kandidatt Anni Saara Aikio. Tuâjjla tuâjjan lij sääʹmǩiõllsa da -kulttuur meâldlaž nuõrituâj oouʹdummuš sääʹmvuuʹd kooʹddin haʹŋǩǩõsplaan meâldlânji õõutveäkka Sääʹmteeʹǧǧ nuõrisuåvtõõzzin da haʹŋǩǩõõzz ohjjeemjooukin.
– Tuâjj vaaikti samai miõlǩiddsiʹžžen. Muʹnne lij vääžnai, što sääʹmnuõrid jäʹrjstet tåimmjummuž jiijjâs ǩiõlin, di jiijjâs kulttuuʹre vuâđđõõvvi tåimmjummuž. Lij vääžnai nuʹt raaveed sääʹmnuõri vuässadvuõđ ǥu sääʹmnuõri identiteeʹtt da kuullâmvuõđ tobddi. Haaʹlääm leeʹd mieʹldd ooudâsviikkmen sääʹmnuõri âsttääiʹj tåimmjummuž, särnn Anni Saara Aikio.
Anni Saara Aikio
Haʹŋǩǩõõzz tåimmjummuš jäʹrjstet sääʹmnuõri tuõivvji vuâđâld. Ijahis Idja -festivaalin lanseerââʹstet kõõjjõõzz, koin kaartʼtet nuõri tuõivvjid sääʹmǩiõllsaž âsttääiʹj tåimmjummšest. Haʹŋǩǩõs lij mieʹldd Ijahis Idja -festivaalin. Neäʹttel-loopp ääiʹj haʹŋǩǩõstuâjjlain vuäitt kaaunõõttâd Sääʹmteeʹǧǧ Nuõrisuåvtõõzz kåvvsest 16.–17.8.2024 čiâss 17.30–20.30.
Kõõjjõʹsse vuäitt vaʹstteed še 8.9.2024 räjja Ijahis Idja -festivaalin õlmstõttum lomaakk pääiʹǩ. De! 2 -haʹŋǩǩõõzz jäʹrjsteeʹj tuäivva vueiʹtlva mäŋggaz sääʹmnuõr vaʹstteem kõõjjõʹsse, što pâʹsttep jäʹrjsted nuõrid miõllsa tåimmjummuž pirr sääʹmvuuʹd.
De! 2 –haʹŋǩǩõs leäi mieʹldd Vuâčč Lappi markknin 10.8.2024 päärnai- da nuõrikåvvsest. Kåvvsest raʹjje piinsid, tobdstõʹtte haʹŋǩǩõʹsse da Sääʹmteeʹǧǧ nuõrisuåvtõõzz tåimmjummša. Päärna da nuõr pieʹsse še ǩiččlõddâd njuärstummuž.
Haʹŋǩǩõõzz tåimmjummuž vuäitt seuʹrrjed sosiaalʼlaž mediast haʹŋǩǩõõzz Instagram-seeidain, @de_astoaiggedoaibma. Tåimmjummšest teâđtet še nuõrisuåvtõõzz sosiaalʼlaž mediain.
De! 2 – sääʹmǩiõllsa nuõrituâj õõudâsviikkmõš sääʹmvuuʹd kooʹddin -haʹŋǩǩõõzzâst õõudâsviiǥǥât sääʹmǩiõllsa da -kulttuur meâldlaž nuõrituâj sääʹmvuuʹd kooʹddin. Haʹŋǩǩõõzzâst õhttsažtuâjjkueiʹmmen sääʹmvuuʹd kooʹddi lââʹssen lie Sääʹmvuuʹd škooultõskõõskõs da Nuorisokeskus Vasatokka. Sääʹmteeʹǧǧ nuõrisuåvtõs lij vuäǯǯam nuõrituâj õõuʹdeemhaʹŋǩǩõʹsse 46 500 € teäggtõõzz Lappi vuʹvddvaaldâšmkonttrest. Haʹŋǩǩõs peštt eeʹjj 2024 loopp räjja.
Looǥǥ lââʹzz De! 2 -haʹŋǩǩõõzz pirr tääiʹben.
Lââʹssteâđ:
Anni Saara Aikio
De! 2 -haʹŋǩǩõs projeʹktt-tuâjjlaž
anni-saara.aikio@samediggi.fi
tel. 044 901 3500
