Säminuorâi taaiđâtábáhtus kalga kiäsádâttâđ On Air Inari -tábáhtus orniimist já Sämitigge iävtut sämikuávlu kieldáid uásálistem sáttukoloid

Säminuorâi taaiđâtábáhtus kulá väldikodálii Nuorâ kulttuur -viärmádâhân. Väldikodálâš Nuorâ Kulttuur On Air -tábáhtus lii nuorâi taaiđâfestivaal, mii uárnejuvvoo parâlij iivij maaŋgâ päikkikode nettitábáhtussân já parâttes iivij aldatábáhtussân. Tábáhtus lii čuosâttum Säminuorâi taaiđâtábáhtusâst spiekâstmáin 13–29-ihásáid nuoráid. Taan ive maaŋgâ päikkikode tábáhtus uárnejuvvoo satelliittábáhtussân Ruávinjaargâst, Porist, Tamperest, Joensuust, Äänekoskist já uáivikaavpugkuávlust. Toos lasseen lâi vuávájum, ete tábáhtus uárnejuvvoo Anarist.

Sämitigge kalga vaidâlitteh kiäsádâttâđ On Air Inari -tábáhtus orniimist. Satelliittábáhtus koloh liččii valdum Säminuorâi taaiđâtábáhtus budjetist. Säminuorâi taaiđâtábáhtus ive 2024 budjetist iä lah valdum huámmášumán nube tábáhtus orniimist šaddee lasakoloh. Toos lasseen, ete budjet ij lah rijttevâš, te tot äšši, ete satelliittábáhtus ornimäigi lii hellâtuorâstuv já enijpeeivi kooskâst, čaittâšui kuhes maađhij já luánduiäláttâs keežild eromâš hástulâžžân, tastko maaŋgah sämikuávlu nuorah láá mieldi puásuituálust.

Sämitige ornim tábáhtusâin lii tehálâš väldiđ huámmášumán sierâ kielâjuávhui já miätá sämikuávlu sehe sämikuávlu ulguubeln ässee párnái já nuorâi uásálistemmáhđulâšvuođâid. Lávurdâheehid ornimnáál tábáhtus orniistâlmáid hástusijd tovâttiččii sämikuávlu kuhes määđhih já maađhijn šaddee ijâstâllâmtáárbuh.

Meid oovtâstpargokuoimij finnim satelliittábáhtusân čaittâšui lemin epirealistlâš mittomeeri Sämitige taaiđâtábáhtusân väridum rájálij resursij háárán. Säminuorâi taaiđâtábáhtus koloh láá stuárrum ivveest nuubán, já taan ive taaiđâtábáhtus ruttâdem lii ucceeb ko ovdebij iivij. Sämitigge uáiná, ete vuosâsaajeest kalga čujottiđ rájálijd resursijd Säminuorâi taaiđâtábáhtus orniimân.

– Sämitigge haalijd tain miärádâssáin visásmittiđ, ete Sämitiigán čujottum rájáliih resurseh čujottuvvojeh Säminuorâi taaiđâtábáhtus orniimân. Resursijd čuujootmáin viggeh visásmittiđ ollâ tääsi tábáhtus já toohâđ máhđulâžžân sämikuávlu puoh säminuoráid uásálistem taaiđâtábáhtusân, II värisaavâjođetteijee Tuomas Aslak Juuso iätá.

On Air Inari -tábáhtus kiäsádâtmist peerusthánnáá Säminuorâi taaiđâtábáhtus lii mieldi Nuorâ Kulttuur -konseptist. Säminuorâi taaiđâtábáhtusâst väljejuvvoo ovdâsteijee väldikodálii Nuorâ Kulttuur On Air -tábáhtusân. Väljejum ovdâsteijee uásálist tábáhtusân päddejum oovdânpyehtimáin. Nuorâ Kulttuur LIVE -vuolgâttâs vuolgâttuvvoo tábáhtuspeeivi Äänekoskist.

– Säminuorâi taaiđâtábáhtus lii lamaš säminuorâi lávdástemaareen jo vittâ ihelove. Lii tehálâš, ete säminuorah uáinojeh meid väldikodálijn areenain, Juuso juátká.

Säminuorâi taaiđâtábáhtus orniistâlmij já resursij čujottem háárán Sämitigge iävtut Iänuduv, Ucjuv, Aanaar já Suáđigil kieldáid, ete sämikuávlu kieldah uásálisteh jieijâs škoovlâi uáppei taaiđâtábáhtusân uásálistem sáttukoloid. Iävtuttâs tuáváást lii resursij čujottem lasseen sämikuávlu kieldáid kulttuuršoddâdemvuáváámist asâttum mittomeeri tähidiđ jieškote-uv ahejuávkun taaiđâ- já kulttuuršoddâdem vuáđuvuáttámušâid sehe kieldâi lahâaasâtliih pargoh ovdediđ kulttuurpuđâldâsâid, kulttuur finnim sehe taaiđâ- já kulttuuršoddâdem já kulttuuräärbi siäilum. Säminuorâi taaiđâtábáhtus lii čallum uássin Iänuduv, Ucjuv já Aanaar kieldâi kulttuuršoddâdemvuáváámijd. Taaiđâtábáhtusân lohtâseijee linjáámijn Sämitigge lii kuullâm taaiđâtábáhtus pargojuávhu.

Lasetiäđuh:
II värisaavâjođetteijee
Tuomas Aslak Juuso
tuomas.juuso(at)samediggi.fi
040 687 3394

Má. proojeektpargee
Miia Ruokojärvi
miia.ruokojarvi(at)samediggi.fi
044 777 5683