Sámenuoraid dáiddadáhpáhus ferte geassádit On Air Inari -dáhpáhusa lágideamis ja sámediggi evttoha ahte sámeguovllu gielddat oassálastet sáhttogoluide

Sámenuoraid dáiddadáhpáhus gullá riikkaviidosaš Nuorra Kultuvra – fierpmádahkii. Riikkaviidosaš Nuorra Kultuvra On Air -dáhpáhus lea nuoraid dáiddafestivála, mii lágiduvvo páralaš jagiin máŋgga sajis neahttadáhpáhussan ja párahis jagiin lagašdáhpáhussan. Dáhpáhus spiehkkasa Sámenuoraid dáiddadáhpáhusas dainna lágiin, ahte lea oaivvilduvvon 13–29-jahkásaš nuoraide. Dán jagi máŋgga báikegotti dáhpáhus lágiduvvo satelihttadáhpáhussan Roavvenjárggas, Poris, Tamperes, Joensuus, Äänekoskis ja oaivegávpotguovllus, lassin dáhpáhus lei plánejuvvon lágiduvvot Anáris.

Sámediggi ferte dađibahábut geassádit On Air Inari -satelihttadáhpáhusa lágideamis. Satelihttadáhpáhusa golut livčče váldon Sámenuoraid dáiddadáhpáhusa bušeahtas. Sámenuoraid dáiddadáhpáhusa jagi 2024 bušeahtas ii leat vuhtiiváldon nuppi dáhpáhusa lágideami lassegolut. Dan lassin ahte bušeahtta ii leat doarvái stuoris, satelihttadáhpáhusa áigi heláduorastaga ja etniidbeaivvi gaskkas orui leamen guhkes gaskkaid ja luondduealáhusaid dáfus hui hástaleaddji, daningo máŋggat sámeguovllu nuorat leat mielde boazodoalus.

Dáhpáhusain, maid Sámediggi lágida, lea dehálaš vuhtiiváldit sierra giellajoavkkuide gullevaš ja iešguđet guovlluin sámeguovllus ja maid sámeguovllu olggobealde ássi mánáid ja nuoraid oassálastinvejolašvuođaid. Dáhpáhusa ordnemiidda, mii lágiduvvo lávvardaga eahkedis, hástalusaid buvttašii sámeguovllu guhkes mátkegaskkat ja maid idjadandárbbut, maid mátkegaskkat dagahit.

Maiddái ovttasbargoguimmiid oažžun satelihttadáhpáhussii ii orron leamen realisttalaš ulbmil Sámedikki dáiddadáhpáhussii várrejuvvon resurssaid dáfus. Sámenuoraid dáiddadáhpáhusa golut leat lassánan jagis nubbái, ja dán jagi dáiddadáhpáhusa ruhtadeapmi lea unnitgo ovddit jagiin. Sámediggi oaidnu lea, ahte ovddemužžan bidjat rájálaš resurssaid Sámenuoraid dáiddadáhpáhusa lágideapmái.

– Sámediggi háliida dáinna mearrádusain sihkkarastit, ahte Sámediggái čujuhuvvon rájálaš resurssaid sáhttá bidjat Sámenuoraid dáiddadáhpáhusa lágideapmái. Čujuhemiin resurssaid dáiddadáhpáhussii viggojuvvo sihkkarastit, ahte dáhpáhus lea alla dását ja ahte buohkat sámeguovllu sámenuorat besset searvat dasa, II várreságajođiheaddji Tuomas Aslak Juuso dadjá.

On Air Inari -dáhpáhusas geassádeamis fuolakeahttá Sámenuoraid dáiddadáhpáhus lea mielde Nuorra Kultuvra -konseapttas. Sámenuoraid dáiddadáhpáhusas válljejuvvo ovddasteaddji riikkaviidosaš Nuorra Kultuvra On Air -dáhpáhussii. Válljejuvvon ovddasteaddji searvá dáhpáhussii báddejuvvon ovdanbuktimiin. Nuorra Kultuvra LIVE -sátta sáddejuvvo dáhpáhusbeaivve Äänekoskis.

– Sámenuoraid dáiddadáhpáhus lea leamaš Sámenuoraid ovdanbuktinarena juo viđa jahkelogi áigge. Lea dehálaš, ahte sámenuorat oidnojit maid riikkaviidosaš arenain, Juuso joatká.

Sámenuoraid dáiddadáhpáhusa ordnemiid ja resurssaid čujuheami hárrái Sámediggi evttoha Eanodaga, Ohcejoga, Anára ja Soađegili gielddaide, ahte sámiid ruovttuguovllu gielddat oassálastet iežas skuvllaid oahppiid dáiddadáhpáhussii searvama sáhttogoluide. Evttohusa duohken lea resurssaid čujuheami lassin sámeguovllu gielddaide kulturbajásgeassinplánas ásahuvvon ulbmil, man mielde dáhkidit guđege ahkejovkui dáidda- ja kulturbajásgeassima vuođđovásáhusaid ja  gielddaid lágas mearriduvvon bargguid, maiguin ovddidit kultuvrra hárjeheami, oažžunvejolašvuođaid ja maid dáidda- ja kulturbajásgeassima ja kulturárbevieru seailuma. Sámenuoraid dáiddadáhpáhus lea girjejuvvon oassin Eanodaga, Ohcejoga ja Anára gielddaid kulturbajásgeassima. Dáiddadáhpáhussii gullevaš dihkádemiin Sámediggi lea gullan dáiddadáhpáhusa bargojoavkku.

Lassedieđut:
II várreságajođiheaddji
Tuomas Aslak Juuso
tuomas.juuso(at)samediggi.fi
040 687 3394

Má. prošeaktabargi
Miia Ruokojärvi
miia.ruokojarvi(at)samediggi.fi
044 777 5683