Sääʹmnuõri čeäʹppvuõttpeiʹvv joudd ǩeässõõttâd On Air Inari -šõddmõõžž jäʹrjstummšest da sääʹmteʹǧǧ eʹtǩǩad sääʹmvuuʹd kooʹddid jååʹđtemkuulid vuässõõttmõõžž

Sääʹmnuõri čeäʹppvuõttpeiʹvv kooll väʹlddkååddliʹžže Nuori Kulttuuri -säimmõʹsse. Väʹlddkååddlaž Nuori Kulttuuri On Air -šõddmõš lij nuõri čeäppõsfestivaal, kååʹtt jäʹrjstet paarlaž iiʹjjin määŋgpäikksiʹžžen neʹttšõddmõššân da paarteʹmes iiʹjjin âʹlddšõddmõššân. Šõddmõš lij jurddum Sääʹmnuõri čeäʹppvuõttpeeiʹvest čoʹrsteeʹl 13–29-ekksaid nuõrid. Tän eeʹjj määŋgpäikksaž šõddmõš jäʹrjstet satellittšõddmõššân Ruäʹvnjargg, Pori, Tampere, Joensuu, Äänekoski gåårdin da vueiʹvvgååradvuuʹdest, lââʹssen šõddmõš leäi jurddum jäʹrjstemnalla Aanrest.

Sääʹmteʹǧǧ joudd ååʹn ǩeässõõttâd On Air Inari -satellittšõddmõõžž jäʹrjstummšest. Satellittšõddmõõžž kuul leʹčči šõddâm käʹttemnalla Sääʹmnuõri čeäʹppvuõttpeeiʹv budjeeʹttest. Sääʹmnuõri čeäʹppvuõttpeeiʹv eeʹjj 2024 budjeeʹttest jiâ leäkku valddum lokku nuuʹbb šõddmõõžž jäʹrjstummšest šõddâm lââʹsskuul. Budjeeʹtt riʹjttjeteʹmesvuõđ lââʹssen satellittšõddmõõžž ääiʹjpoodd sâjjdõõttmõš voʹzzenʼjapeeiʹv da jieʹnnipeeiʹv kõʹsǩǩe očndõõđi kuʹǩes kõõski da luâttjieʹllemvuõʹjji beäʹlnn samai vaiggân, ǥu määŋg sääʹmvuuʹd nuõr liâ mieʹldd puäʒʒhååidast.

Sääʹmteeʹǧǧ jäʹrjstem šõddmõõžžin lij vääžnai väʹldded lokku jeeʹres ǩiõlljooukid kuulli da jeeʹres beäʹlnn sääʹmvuuʹd di sääʹmvuuʹd åålǥbeäʹlnn jälsteei päärnai da nuõri vuässõõttâmvueiʹtlvažvuõđ. Sueʹvet jeäʹǩǩää jäʹrjstem šõddmõõžž jäʹrjstummšid pooutče vaʹǯǯtõõzzid sääʹmvuuʹd kuʹǩes kõõsk da tõin šõddi instemkuul.

Še õhttsažtuâjjkuõiʹmi vuäǯǯmõš satellittšõddmõʹšše očndõõđi pannrealiistlaž täävtõssân Sääʹmteeʹǧǧ čeäʹppvuõttpeivva vaʹrrjum raajlaž resuursid vueiʹneeʹl. Sääʹmnuõri čeäʹppvuõttpeeiʹv kuul liâ kaggõõttâm eeʹjjest nobba, da tän eeʹjj čeäʹppvuõttpeeiʹv teäggtõs lij uuʹccab ǥu ääiʹjbu iiʹjjin. Sääʹmteʹǧǧ vuäinn vuõss-sâjjsiʹžžen tillʼlõõvvâd raajlaid resuursid Sääʹmnuõri čeäʹppvuõttpeeiʹv jäʹrjstummša.

– Sääʹmteʹǧǧ haaʹlad täin tuʹmmstõõǥǥin ainsmâʹtted, što Sääʹmtegga čuäʹjtum raajjla resuurs vuäǯǯat tillʼlõvvum Sääʹmnuõri čeäʹppvuõttpeeiʹv jäʹrjstummša. Resuursi tillʼlõõvvmõõžžin ǩiččlõõđât ainsmâʹtted vueʹǩǩšõs šõddmõš da vueiʹtlvâʹstted čeäʹppvuõttpeivva vuässõõttmõš pukid sääʹmvuuʹd sääʹmnuõrid, II väärrsaaǥǥjååʹđteeʹjj Tuomas Aslak Juuso särnn.

On Air Inari -šõddmõõžž ǩeässõõttmõõžžâst huõlǩani Sääʹmnuõri čeäʹppvuõttpeiʹvv lij mieʹldd Nuori Kulttuuri -konseeptâst. Sääʹmnuõri čeäʹppvuõttpeeiʹvest vaalšet ǩeâštʼteei väʹlddkååddliʹžže Nuori Kulttuuri On Air -šõddmõʹšše. Vaalšum ǩeâštʼteei vuässââtt šõddmõʹšše jiõntum čuäjtõõzzin. Nuori Kulttuuri LIVE -vuõlttõs vuõltteet čeäppvuõttpeiʹvven pääiʹǩest Äänekoski.

– Sääʹmnuõri čeäʹppvuõttpeiʹvv lij leämmaž sääʹmnuõri čuäjtõõttâmareena juʹn viiđ eeʹǩǩlååi ääiʹj. Lij vääžnai, što sääʹmnuõr kuâsttje še väʹlddkååddlaž areenain, Juuso juätkk.

Sääʹmnuõri čeäʹppvuõttpeeiʹv jäʹrjstummšid ja resuursi tillʼlõõvvmõʹšše õhttneeʹl Sääʹmteʹǧǧ eʹtǩǩad Jeänõõǥǥ, Uccjooǥǥ, Aanar da Suäʹđjel kooʹddid, što sääʹm dommvuuʹd kååʹdd vuässâʹtte škoouleez škooulniiʹǩǩi čeäʹppvuõttpeivva vuässõõttmõõžž õõudldem jååʹđtemkuulid. Eʹtǩǩõõzz tuâǥǥast lij resuursi tillʼlõõvvmõõžž lââʹssen sääʹmvuuʹd kooʹddid kulttuuršõddeemplaanâst šiõttuum täävtõs täʹǩǩeed juõʹǩǩ ââʹǩǩjouʹǩǩe čeäppõs- da kulttuuršõddmõõžž vuâđđtoobdâlm di kooʹddi lääʹjjmeâldlaž tuâj oouʹdeed kulttuur staarjõõttmõõžž, vuäǯǯamvuõđ di čeäppõs- da kulttuuršõddmõõžž da kulttuuräʹrbbvuõđ seillmõõžž. Sääʹmnuõri čeäʹppvuõttpeiʹvv lij ǩeeʹrjuum pieʹǩǩen Jeänõõǥǥ, Uccjooǥǥ da Aanar kooʹddi kulttuuršõddeemplaanid. Čeäppvuõttpeivva õhttneei linjjõõzzin Sääʹmteʹǧǧ lij kuullâm čeäʹppvuõttpeeiʹv tuâjj-joouk.

Lââʹssteâđ:
II väärrsaaǥǥjååʹđteeʹjj
Tuomas Aslak Juuso
tuomas.juuso(at)samediggi.fi
040 687 3394

Mä. projeʹktt-tuâjjlaž
Miia Ruokojärvi
miia.ruokojarvi(at)samediggi.fi
044 777 5683