Sämitige ekonomiačällen algâttâm Iida Nuorgam
Sämitige stivrâ nomâttij čuákkimstis 1/2025 ekonomiačällee viirgán Iida Nuorgam. Nuorgam lii porgâm ovdil ei. Sämitige almoshaldâttuvâst já valmâštum kieskâd tradenomin.
Kove: Johanna Alatorvinen / Sämitigge.
Iida Nuorgam lii ovdil porgâm Sämitiggeest almos toimâttuvâst almoshaldâttuv pargoin ovdâmerkkân haldâttâhvuávájeijen já toimâttâhčällen. Suu ekonomiahaldâttuv mättim sehe Sämitige tááláá organisaatio sehe almos- já ekonomiahaldâttuv tubdâm lii nanos. Ulmen lii peessâđ ovdediđ ekonomiahaldâttuv mättim oles ekonomiatoimâttuv tiimi navcâiguin.
– Tuođâi suotâs juátkiđ porgâm uápis pargopirrâsist Sämitiggeest já peessâđ porgâđ sämiaalmug oovdân. Tooleeb pargohárjánem tääbbin lii adelâm jo pyeri oleskove Sämitige tooimâst, mii iššeed iberdiđ meid táálu ekonomiahaldâttuv vijđes olesvuođâ. Tradenomin mun valmâštuvvim tijmá pargo paaldâst já lii lamaš suotâs huámmášiđ, maht mun lam peessâm jo anneeđ ävkkin uápui pyehtim mättim. Tääl lii pyeri juátkiđ uđđâ hástusijguin, iätá Nuorgam.
Sämitigge kulluuttij uuccâmnáál ekonomiačällee virge ive 2024 loopâbeln, ko ekonomiačällen toimâm Irmeli Moilanen almottij, ete sun páácá iäláttâhân. Ekonomiačällee viirgán pottii meriääigi räi nelji ucâmuš. Sämitige stivrâ sahhiittâlâi puoh occeid já toovâi miärádâs valjiimist čuákkimstis 13.1.2025.
Sahhiittâlmij maŋa Sämitige stivrâ valjij oovtâmielâlávt ekonomiačällee viirgán Iida Nuorgam. Nuorgam lii algâttâm pargostis kuovâmáánust 2025. Ekonomiačällee tuáimá Sämitiggeest almos toimâttuv ekonomiatoimâttuvâst. Ekonomiačällee pargon lii huolâttiđ Sämitige ekonomiahaldâttuvâst sehe hoittáđ Sämitige reekkigtuálu já rähtiđ reekkigtuálulopâttem jieškođe-uv tilipaajeest.
Lasetiäđuh:
Iida Nuorgam
Ekonomiačällee
044 760 1001
iida.nuorgam@samediggi.fi
Pia Ruotsala-Kangasniemi
Haldâttâhhovdâ
040 726 2688
pia.ruotsala@samediggi.fi
