Sämitige stivrâ joođhij vuáháduttemtooimâi valmâštâllâm
Sämitige stivrâ čokkânij káávcád tove 25.6.2024. Äššilistoost lâi tuš ohtâ äšši, budjetčuoppâmij tovâttem vuáháduttemtooimah.
Sämitige budjet ihán 2025 áiguh čuoppâđ staatâekonomia vädis tile keežild. Taan räi lii tiäđust, ete kuittâg ruttâdem, mii puátá Sämitiigán riehtiministeriö peht, čuáppoo merhâšitteht. Tärhis sume iä liijká vala tieđe.
Sämitige haldâttâh lii valmâštâlškuáttám šiäštuvuávám já analysistâm vuáháduttemtoimáid lohtâseijee riävtálijd vuolgâsoojijd, maid pargoadeleijee kalga väldiđ huámmášumán, ko vuáhádut jieijâs tooimâ ekonomâlij agâiguin.
Sämitige stivrâ kuulâi čuákkimist tilekejâstuv vuáháduttemvuáváámist.
– Valmâštâllâm lii vala koskân, mutâ mist lâi pyeri savâstâllâm máhđulijn šiäštučuosâttuvâin. Lii čielgâs, ete staatâ vädis ekonomiatiileest meid Sämitigge uásálist almos ekonomia vuáháduttemtalgoid, iätá saavâjođetteijee Pirita Näkkäläjärvi.
Sämitige stivrâ lii kuittâg huolâstum tast, maht Sämitigge pasta budjetčuoppâmij maŋa tipšođ lahâaasâtlijd pargoidis.
– Mii ulmen lii miäruštâllâđ, ete mon stuárusijd vuáháduttemtooimâid mij lep kiärgus olášuttiđ tienuuvt, ete Sämitige máhđulâšvuođah hoittáđ jieijâs lahâaasâtlijd pargoid iä hiäjusmuu ige meid sämmiláid algâaalmugin kullee vuoigâdvuođâi olášume hiäjusmuu, saavâjođetteijee Näkkäläjärvi iätá.
Vuáháduttemvuávám valmâštâllâm juátkoo porgemáánust oovtâst Sämitige pargeiguin. Pargeid lii adelum tiätu já adeluvvojeh tiäđuh vuáháduttemvuáváámist tađe mield, ko lasetiäđuh puátih.
Lasetiäđuh:
Pirita Näkkäläjärvi
Saavâjođetteijee
044 7533 766
pirita.nakkalajarvi@samediggi.fi
