Sääʹmteeʹǧǧ halltõs jueʹtǩi šiõtteemtååimai valmštõõllmõõžž

Sääʹmteeʹǧǧ budjeeʹtt eeǥǥas 2025 ääiǥat čuõppâd riikktääl vaiʹǧǧes vueʹjj diõtt. Tän mõõneeʹst tieʹđet, što aainâs vuõiggâdvuõttministeria pääiʹǩ Sääʹmtegga pueʹtti teäggtõõzz puäʹđet čuõppâd miârkteeinalla. Tääʹrǩes suum jeät kuuitâǥ veâl tiõttu.

Sääʹmteeʹǧǧ vaaldâšm lij älggam valmštõõllâd šeäʹšttemplaan da analysâʹstted šiõtteemtååimaid õhttneei juriidlaž vuâlggsõõʹjid, koid tuâjjuʹvddi âlgg väʹldded lokku, ko šiõttad toiʹmmjummšes tällõõzzlaž määinai vuâđald.

Sääʹmteeʹǧǧ halltõs kuuli såbbreʹstes ǩičldõõǥǥ šiõtteemplaanâst.

– Valmštõõllmõš lij veâl kõõskrääʹjest, leâša čõõđtim šiõǥǥ saǥstõõllmõõžž vueiʹtlvaž šeäʹšttempaaiʹǩin. Lij čiõlǥâs, što Sääʹmteʹǧǧ vuässââtt še õõlmâs tääl šiõtteemtååimaid riikk čougg täällvueʹjjest, särnn saaǥǥjååʹđteei Pirita Näkkäläjärvi.

Sääʹmteeʹǧǧ halltõs âânn kuuitâǥ huõl tõʹst, mäʹhtt Sääʹmteʹǧǧ spraavdââtt budjeʹttčuõppmõõžži mâŋŋa lääʹjjest šiõttuum tuâjaines.

– Mij täävtõssân lij meärtõõllâd, mõõn šoora šiõtteemtååimaid pâʹsttep tõntää, što Sääʹmteeʹǧǧ vueiʹttemvuõđ hoiʹddjed lääʹjjest šiõttuum tuâjees da säʹmmlaid alggmeeran kuulli vuõiggâdvuõđi teâuddjummuž vaartâʹvve, saaǥǥjååʹđteei Näkkäläjärvi ceälkk.

Šiõtteemplaan valmštõõllmõš juätkkai påʹrǧǧmannust õõutveäkka Sääʹmteeʹǧǧ tuâjjlažkooʹddin. Tuâjjlažkååʹdd leät informâsttam da informââʹstet šiõtteemplaanâst tõn mieʹldd, ko lââʹssteâđ puäʹtte.

Lââʹssteâđ:

Pirita Näkkäläjärvi
Saaǥǥjååʹđteei
044 753 3766
pirita.nakkalajarvi@samediggi.fi