Sámedikki stivra jotkkii heivehandoaimmaid válmmaštallama

Sámedikki jagi 2025 bušeahta áigot čuohppat váttes stáhta ruhtadili dihtii. Dán muttus diehtit goit dan ahte ruhtadeami, mii boahtá Sámediggái vuoigatvuođaministeriija bokte, áigot sakka čuohppat. Dárkilis supmi eai vel dieđe.

Sámedikki hálddahus lea álgán válmmaštallat seastinplána ja analyseret heivehandoaimmaid juridihkalaš vuolggasajiid, maid bargoaddi galgá váldit vuhtii go heiveha iežas doaimma ekonomalaš ákkaid vuođul.

Sámedikki stivra gulai čoahkkimis heivehanplána dili birra.

– Válmmaštallan lea ain gaskan, muhto mis lei buorre ságastallan das, makkár áššiin sáhtášeimmet seastit. Lea čielggas ahte stáhta čavga ruhtadilis maiddái Sámediggi searvá stáhta almmolaš ruhtadoalu heivehanbargguide, lohká ságadoalli Pirita Näkkäläjärvi.

Sámedikki stivra lea goittotge fuolas das, mo Sámediggi bastá dikšut dasa lágas ásahuvvon bargguid bušeahttačuohppamiid maŋŋá.

– Min áigumuššan lea meroštallat man viiddes heivehandoaimmaide mii nákcet vai basttášeimmet liikká dikšut lágas ásahuvvon bargguid, ja vai sámiid eamiálbmotrivttiid ollašuvvan ii áitojuvvošii, dadjá ságadoalli Pirita Näkkäläjärvi.

Heivehanplána válmmaštallan joatkašuvvá borgemánus ovttas Sámedikki bargiiguin. Bargit leat ožžon ja bohtet oažžut dieđu heivehanplánas dađi mielde go lasi diehtu das boahtá.

Lassedieđut:

Pirita Näkkäläjärvi
Ságadoalli
044 7533 766
pirita.nakkalajarvi@samediggi.fi