Sämitige stivrâ meridij 193 000 euro vuáháduttemtooimâin

Sämitige stivrâ kieđâvušâi čuákkimstis Sämitige vuáháduttemtooimâid ihán 2025 uđđâ šiäštusume vuáđuld.

Suomâ haldâttâs 3.9. toollâm budjetsavâstâllâm puáđusin staatâ budjetiävtuttâsâst 2025  Sämitige kulttuurjiešhaaldâšmân čyeccee čuoppâm lii 193 000 eurod, ko porgemáánust staatâvarijministeriö iävtuttem čuoppâm lâi vala 568 000 eurod.

Sämitigge poorgâi čuuvtij vaiguttempargo čuoppâmij ucceedmân já teeivâi ovdil budjetsavâstâlmijd iärásij juávhust uáiviminister Petteri Orpo (kok.), máttááttâs- já tave-eennâmlii oovtâstpargo minister Anders Adlercreutz (rap), ovdâskoddejuávhui saavâjođetteijeid já aalmugovdâsteijeid.

– Mun halijdâm kijtteđ puohâid vaiguttempargoost. Mij luhostuim čielgiđ merideijeid, ete mon merhâšittee paijeel pele miljovn čuoppâm ličij Sämitiigán. Mij karttâp tiäđust-uv ain šeštiđ uáli ennuv, mutâ ep nuuvt ennuv ko algâ aalgâst iävtuttui. Taat älkkeedit puáttee ive vuávám ennuv, Sämitige saavâjođetteijee Pirita Näkkäläjärvi iätá.

Sämitige stivrâ tuhhiittij čuákkimstis 18.9. rekinistmijd vuáháduttemtooimâin ihán 2025 ohtsâštoimâmráđádâlmij vuáđđun toin iävttoin, ete staatârääđi 23.9. almostittem staatâ budjetiävtuttâsâst 2025 iä iävtuttuu nubástusah Sämitige almostorjuu uásild.

Šiäštuh čyeccih haldâttâhkoloid, pargoviehâhaldâttâhkoloid, ekonomiahaldâttâhkoloid, tave-eennâmlii sämikielâi äššitobdeeorgaanân Kielâkäldei já pargotiervâsvuođâkoloid. Toos lasseen vuáháduttemvuávám uássin stivrâ toovâi väärridmijd Säämi kulttuurkuávdáš Saijoos vyebdim já Sämitige tooimâ oovdedmân.

– Mij lep hiälpáskâm tast, ete vuáháduttemtooimâi uássin mij ep taarbâš celkkiđ luovâs Sämitige pargeid, Näkkäläjärvi iätá.

Sämitige stivrâ asâttij čuákkimstis 19.8. oovtâsttoimâmorgaan, mii kieđâvuš pargoadeleijee iävtuttâs vuáháduttemtoimân ihán 2025. Sämitige pargeeh láá valjim jieijâs ovdâsteijeid oovtâsttoimâmorgaanân.

Sämitige olesbudjet lii suulân 10 miljovn eurod. Kulttuurjiešhaaldâšmân čujottuvvojii taan ive 4,968 miljovn eurod, ko puáttee ive budjetist toos čujottuvvojeh 4,775 eurod.

Čuávuvâžžân staatâ budjetiävtuttâs ihán 2025 kieđâvuššoo staatâvarijváljukoddeest sehe staatârääđi almosčuákkimist 23. čohčâmáánu. Budjet tuhhiittuvvoo ovdâskoddeest juovlâmáánust.

Sämitige tievâsčuákkim tuhhit Sämitige toimâvuávám–budjet ihán 2025 juovlâmáánu čuákkimist.

Lasetiäđuh:
Pirita Näkkäläjärvi
Saavâjođetteijee
044 7533 766
pirita.nakkalajarvi@samediggi.fi