Sääʹmteeʹǧǧ halltõs tuʹmmii 193 000 eeuʹr šiõttlâʹttemtååimain

Sääʹmteeʹǧǧ halltõs ǩiõttʼtõõli såbbreʹstes Sääʹmteeʹǧǧ šiõttlâʹttemtååimaid eeǥǥas 2025 ođđ šeäšttsuumm vuâđald.

Lääʹdd halltõõzz 3.9. ââʹnnem budjeʹttsaǥstõõllmõõžž puʹhttmen riikk tällõsarvvlõseʹtǩǩõõzzâst 2025  Sääʹmteeʹǧǧ kulttuurjiõččvaaldâšm kuõskki čuõppmõš lij 193 000 euʹrred, ǥu påʹrǧǧmannust riikkvääraiministeria eʹtǩǩeem čuõppmõš leäi veâl 568 000 euʹrred.

Sääʹmteʹǧǧ tuejjii jiânnai vaaiktemtuâj čuõppmõõžži ǩieʹppeem õuʹdde da kaaunõõđi õuʹddel budjeʹttsaǥstõõllmõõžž jeeʹrab mieʹldd väʹlddminister Petteri Orpoin (kok), mättʼtõs- da tâʹvvjânnmallaš õhttsažtuâj minister Anders Adlercreutzinin (rkp), eeʹttiǩ-kåʹddjoouki saaǥǥjååʹđteeikooʹddin da eeʹttiǩ-kåʹddniiʹǩǩivuiʹm.

– Haaʹlääm späʹssbõõššâd pukid vaaiktemtuâj õõudâst. Oʹnstim čiõʹlǧǧeed tuʹmmeeʹjid, mõõn loʹsses pâʹjjel peäʹl miljoon čuõppmõš leʹčči Sääʹmtegga. Jouddâp teâđast šeäʹštted õinn veâl miâlggâd jiânnai, leša jeäʹp nuʹt jiânnai ǥu alggaalǥâst eʹtǩǩeeš. Tät hiâlpat pueʹtti eeʹjj plaanmõõžž jiânnai, sääʹmteeʹǧǧ saaǥǥjååʹđteei Pirita Näkkäläjärvi särnn.

Sääʹmteeʹǧǧ halltõs priimi såbbreʹstes 18.9. laasklmid šiõttlâʹttemtååimain eeǥǥas 2025 õt-saǥstõõllmõõžži vuâđđan õudldeeʹl, što riikksuåvtõõzz 23.9. õlmstâʹttem riikk tällõsärvvlõseʹtǩǩõõzzâst 2025 jeät čuäʹjtuku muttsid Sääʹmteeʹǧǧ takaiveäʹǩǩvuõđ kuõskeeʹl.

Šeäšttmõõžž kueʹsǩǩe vaaldâšmkoolaid, tuâjjlažkåʹddvaaldâšmkoolaid, tällõsvaaldâšmkoolaid, õhttsažtâʹvvjânnmallaš sääʹmǩiõli äʹšštobddiorgaan Ǩiõllkaʹlddi da tuâjjtiõrvâsvuõttkoolaid. Lââʹssen vueʹssen šiõttlâʹttemplaanâst halltõs tuejjii vaʹrrjõõzzid sääʹmkulttuurkõõskõs Sajoozz kaaupšem da Sääʹmteeʹǧǧ toiʹmmjem õõuʹdummša.

– Leäʹp hiâlptõõvvâm tõʹst, što vueʹssen šiõttlâʹttemtååimain jeäʹp taarbâž čåuʹdded  Sääʹmteeʹǧǧ tuâjjlažkååʹdd meädda, Näkkäläjärvi särnn.

Sääʹmteeʹǧǧ halltõs šiõttii såbbreʹstes 19.8. õhttsažtoiʹmmjemorgaan, kååʹtt ǩiõttʼtââll tuâjjuuʹdi eʹtǩǩõõzz šiõttlâʹttemtåimman eeǥǥas 2 025. Sääʹmteeʹǧǧ tuâjjla lie vaʹlljääm jiiʹjjes eeʹttkõʹsttjeez õhttsažtoiʹmmjemorgaaʹne.

Sääʹmteeʹǧǧ budjeʹtt obbnes lij nuʹt 10 miljoon euʹrred. Kulttuurjiõččvaaldšma čuäʹjteš taʹnni 4,968 miljoon euʹrred, ǥu pueʹtti eeʹjj tällõsarvvlõõzzâst tõõzz čuäʹjtet 4,775 euʹrred.

Pueʹtti vuâra riikk tällõsarvvlõseʹtǩǩõõzz eeǥǥas 2025 ǩiõttʼtõõlât riikkvääraivälljkååʹddest di riikksuåvtõõzz tiuddsåbbrest čõhččmannu 23. peeiʹv. Tällõsarvvlõõzz priimât eeʹttiǩ-kååʹddest jooulmannust.

Sääʹmteeʹǧǧ tiuddsååbbar preemm Sääʹmteeʹǧǧ tåimmplaan-tällõsarvvlõõzz eeǥǥas 2025 jooulmannu såbbreʹstes.

Lââʹssteâđ:
Pirita Näkkäläjärvi
Saaǥǥjååʹđteei
044 7533 766
pirita.nakkalajarvi@samediggi.fi