Sámedikki stivra mearridii 193 000 euro seastindoaimmain

Sámedikki stivra gieđahalai čoahkkimis Sámedikki seastindoaimmaid jahkái 2025 ođđa seastinsupmi vuođul.

Suoma ráđđehusa 3.9. doallan bušeahttačoahkkima boađusin stáhta bušeahttaevttohusas 2025  Sámedikki kulturiešráđđemii guoski geahpádus lea 193 000 euro, go borgemánus ruhtaministeriija evttohan čuohppan lei vel 568 000 euro.

Sámediggi barggai olu váikkuhanbarggu čuohppamiid uhcideapmin ja deaivvadii ovdal bušeahttačoahkkima earret eará stáhtaministtar Petteri Orpoin (olg), oahpahus- ja davviriikkalaš ovttasbarggu ministtar Anders Adlercreutziin (ráb), riikkabeaijoavkkuid ságajođiheaddjiiguin ja riikkabeaiáirasiiguin.

– Háliidan giitit buohkaid váikkuhanbarggu ovddas. Mii lihkostuvaimet čilget mearrideaddjiide, man lossat badjel bealle miljovnna geahpádus livčče Sámediggái. Mii gártat dieđusge seastit ain viehka olu, muhto eat nu olu go álggos evttohuvvui. Dát álkidahttá boahtte jagi plánema, Sámedikki sátnejođiheaddji Pirita Näkkäläjärvi muitala.

Sámedikki stivra dohkkehii čoahkkimis 18.9. rehkenastimiid seastindoaimmain jahkái 2025 ovttasdoaibmanráđđádallamiid vuođđun dainna eavttuin, ahte stáhtaráđi stáhta bušeahttaevttohusas 2025, mii almmustahtto 23.9., eai ovdanbukto nuppástusat Sámedikki almmolašdoarjagii.

Seastimat čuhcet hálddahusgoluide, bargoveahkahálddahusgoluide, ekonomiijahálddahusgoluide, davviriikkaid oktasaš sámegielaid áššedovdiorgánii Giellagáldui ja bargodearvvasvuođagoluide. Dan lassin seastinplána oassin stivra barggai várremiid sámekulturguovddáš Sajosa vuovdin- ja márkanastindoaimmaid ja Sámedikki doaimma ovddideapmái.

– Dál mis gal miella geahpui, go seastimiid geažil mii eat dárbbaš eretcealkit Sámedikki bargiid, Näkkäläjärvi dadjá.

Sámedikki stivra ásahii čoahkkimis 19.8. ovttasdoaibmanorgána, mii gieđahallá bargoaddi evttohusa seastindoaibman jahkái 2025. Sámedikki bargit leat válljen iežaset ovddasteaddjiid ovttasdoaibmanorgánii.

Sámedikki ollesbušeahtta lea sullii 10 miljovnna euro. Kulturiešráđđemii čujuhuvvui dán jagi 4,968 miljovnna euro, go boahtte jagi bušeahtas dasa juolluduvvo 4,775 euro.

Čuovvovaččat stáhta bušeahttaevttohus jahkái 2025 gieđahallo ruhtaváljagottis sihke stáhtaráđi oktasaščoahkkimis čakčamánu 23. beaivve. Bušeahtta dohkkehuvvo riikkabeivviin juovlamánus.

Sámedikki dievasčoahkkin dohkkeha Sámedikki doaibmaplána-bušeahta jahkái 2025 juovlamánu čoahkkimis.

Lassidieđut:
Pirita Näkkäläjärvi
Sátnejođiheaddji
044 753 3766
pirita.nakkalajarvi@samediggi.fi