Sämitige stivrâ teevdij pargoviehâhoovdâ, ekonomiavuávájeijee já sosiaallâš- já tiervâsvuođâčällee viirgijd

Virgeh, maid stivrâ lii tääl tiävdám, láá Sämitige almolâš toimâttuvvâst já nannejeh Sämitige vuáđutooimâid já vuáđupargo olášuttem. Taah pargoh láá ovdâlist lamaš tevdum meriáigásâš virgekoskâvuođâin, já ko ruttâdem visásmui Sämitige olesčuákkim vuáđudij pargoviehâhoovdâ, ekonomiavuávájeijee já sosial- já tiervâsvuođâčällee fastâ viirgijd čuákkimstis 19.12.2023 Pargoh lijjii uuccâmnáál kuovâmáánu 2024 ääigi já Sämitige stivrâ sahhiittâlâi tohálâšvuođâiävtuid tevdee occeid sehe toovâi miärádâs valjiimist 27.3.2024.

Pargoviehâhovdâ tuáimá hovdâi pargopaarrân já västid ovdâmerkkân pargopyereestvajemân já pargotiervâsvuotân lohtâseijee aašijn. Pargoviehâhovdâ iššeed Sämitige puoh virgeulmuid já pargeid aašijn, moh lahtâseh palvâlemkoskâvuotân, vâi sijjân páácá äigi jieijâs pargo porgâmân.

Ekonomiavuávájeijee parga Sämitige ekonomiatoimâttuvvâst oovtâst ekonomiačällein já toimâttâhčällein. Ekonomiavuávájeijee pargon lii išediđ ovdâmerkkân luáttámušulmuid paalhijd lohtâseijee aašijn sehe västidiđ Sämitige ekonomiast ubâlávt ekonomiačällein.

Sosial- já tiervâsvuođâčällee virge, mii tääl tevdui, puáhtá laseresurijd Sämitige sosial- já tiervâsvuođâsektorân. Sosial- já tiervâsvuođâčällee parga oovtâst nube sosial- já tiervâsvuođâčällein já Tave-Suomâ sosialsyergi mättimkuávdáá sämiohtâduv vuávájeijein eromâš ovdâsvástádâssân sosiaaltorvoääših sehe oovtâstpargo Laapi pyereestvaijeemkuávloin.

Lasetiäđuh:

Pia Ruotsala-Kangasniemi
Haldâttâhhovdâ
010 839 3106 / 040 726 2688
pia.ruotsala@samediggi.fi

Ida Pirttijärvi
pargoviehâhovdâ
040 660 77 22
ida.pirttijarvi@samediggi.fi

Laura Morottaja
ekonomiavuávájeijee
040 677 2521
laura.morottaja@samediggi.fi

Riitta Lehtola-Kosonen
sosial- já tiervâsvuođâčällee
044 777 4820
riitta.lehtola-kosonen@samediggi.fi