Sääʹmteeʹǧǧ halltõs tueʹjjii vaʹlljummšid tuâjjlažkåʹddjååʹđteeʹj, tällõsplaaneeʹj da sosiaal- da tiõrvâsvuõttpiisar viiʹrjid
Sääʹmteeʹǧǧ halltõs vaʹlljii såbbrest 27.3.2024 tuâjjlažkåʹddjååʹđteeʹjen Ida Pirttijärvi, sosiaal- da tiõrvâsvuõttpiisren Riitta Lehtola-Kosonen da tällõsplaaneeʹjen Laura Morottaja.
Viiʹrjid vaʹlljum Ida Pirttijärvi, Riitta Lehtola-Kosonen da Laura Morottaja.
Halltõõzz ååʹn tiuʹddem veeʹrj liâ Sääʹmteeʹǧǧ takai konttrest da raavee Sääʹmteeʹǧǧ vuâđđtååimaid da vuâđđtuâj spraavdõõttmõõžž. Kõõččmõõžžâst åårram tuâj liâ ääiʹjab leämmaž tiuddum mieʹrräiggsaž veʹrǧǧkõskkvuõđin, leša teäggtõõzz ainsmââʹtteen Sääʹmteeʹǧǧ tiuddsååbbar vuâđđii tuâjjlažkåʹddjååʹđteeʹj, tällõsplaaneeʹj da sosiaal- da tiõrvâsvuõttpiisar põõšši viiʹrjid såbbrest 19.12.2024. Tuâj leʹjje ooccâmnalla täʹlvvmannu 2024 ääiʹj da Sääʹmteeʹǧǧ halltõs mainstõõʹtti ââʹntem-määinaid tiuddi ooʒʒjid di tueʹjjii tuʹmmstõõǥǥid vaʹlljummšest 27.3.2024.
Tuâjjlažkåʹddjååʹđteeʹjj tåimm tuâjjlažjååʹđteeʹji tuâjjpaarrân da vaʹsttad ouddmiârkkân tuâjjpuârastvuäittmõʹšše da tuâjjtiõrvâsvuõʹtte õhttneei aaʹššin. Tuâjjlažkåʹddjååʹđteeʹjj vieʹǩǩat pukid Sääʹmteeʹǧǧ veʹrǧǧoummuid da tuâjjlaid kääzzkõsvuõʹtte õhttneei aaʹššin, što äiʹǧǧ påđđan jiijjâs tuâj tuejjummša.
Tällõsplaaneeʹjj tåimm Sääʹmteeʹǧǧ tällõskonttrest õõutsââʹjest tällõspiisrin da koontârpiisrin. Tällõspiisar tuâjjan lij vieʹǩǩted ouddmiârkkân luõʹttjemoummuid paaʹlǩid õhttneei aaʹššin di vaʹstteed Sääʹmteeʹǧǧ tällõõzzâst obbvääldlânji tällõspiisrin.
Ååʹn tiuddum sosiaal- da tiõrvâsvuõttpiisar veʹrǧǧ põhtt lââʹssresuurs Sääʹmteeʹǧǧ sosiaal- da tiõrvâsvuõttsektooʹre. Sosiaal- da tiõrvâsvuõttpiisar tåimm õõutâst nuuʹbb sosiaal- da tiõrvâsvuõttpiisrin da Tâʹvv-Lääʹddjânnam sosiaalsueʹrj siltteemkõõskõõzz sääʹmjuâkkaz plaaneeʹjin, jeäʹrab vasttõssân sosiaalstaanääʹšš di õhttsažtuâjj Lappi pueʹrrvââjjamvuuʹdin.
Lââʹssteâđ
Pia Ruotsala-Kangasniemi
Vaaldâšmjååʹđteeʹjj
010 839 3106 / 040 726 2688
pia.ruotsala@samediggi.fi
Ida Pirttijärvi
tuâjjlažkåʹddjååʹđteeʹjj
040 660 77 22
ida.pirttijarvi@samediggi.fi
Laura Morottaja
tällõsplaaneeʹjj
040 677 2521
laura.morottaja@samediggi.fi
Riitta Lehtola-Kosonen
sosiaal- da tiõrvâsvuõttpiisar
044 777 4820
riitta.lehtola-kosonen@samediggi.fi
