Sámedikki stivra devddii bargiidhoavdda, ekonomiijaplánejeaddji ja sosiála- ja dearvvasvuođačálli virggiid
Sámedikki stivra válljii čoahkkimis 27.3.2024 bargiidhoavdan Ida Pirttijärvi, sosiála- ja dearvvasvuođačállin Riitta Lehtola-Kosonen ja ekonomiijaplánejeaddjin Laura Morottaja.
Virggiide válljejuvvon bargit Ida Pirttijärvi, Riitta Lehtola-Kosonen ja Laura Morottaja.
Virggit, maid stivra lea dál deavdán, leat Sámedikki almmolaš doaimmahagas ja nannejit Sámedikki vuođđodoaimmaid ja vuođđobarggu ollašuhttima. Guoskevaš barggut leat leamaš dán ovdal devdon mearreáigásaš virgegaskavuohtan, muhto go ruhtadeapmi sihkarmuvai, de Sámedikki dievasčoahkkin vuođđudii bargiidhoavdda, ekonomiijaplánejeaddji ja sosiála- ja dearvvasvuođačálli fásta virggiid čoahkkimis 19.12.2024. Barggut ledje ohcan láhkai guovvamánu 2024 áigge ja Sámedikki stivra jearahalai gelbbolašvuođaeavttuid deavdi ohcciid ja válljii bargiid 27.3.2024.
Bargiidhoavda doaibmá doaimmahatjođiheaddjiid bargopárran ja vástida ovdamearkan áššiin, mat laktásit barggus veadjimii ja bargodearvvasvuhtii. Bargiidhoavda veahkeha Sámedikki buot virgeolbmuid ja bargiid áššiin, mat laktásit bálvalangaskavuhtii, vai sidjiide báhcá áigi iežaset bargguid bargamii.
Ekonomiijaplánejeaddji bargá Sámedikki ekonomiijadoaimmahagas ovttas ekonomiijačálliin ja doaimmahatčálliin. Ekonomiijaplánejeaddji bargun lea veahkehit ovdamearkan luohttámušolbmuid áššiin, mat laktásit hávális bálkkáide, ja maiddái fuolahit Sámedikki ekonomiijas oppalaččat ekonomiijačálliin.
Sosiála- ja dearvvasvuođačálli virgi, mii dál devdojuvvui, buktá lasseresurssaid Sámedikki sosiála- ja dearvvasvuođasektorii. Sosiála- ja dearvvasvuođačálli bargá ovttas nuppi sosiála- ja dearvvasvuođačálliin ja Davvi-Suoma sosiálasuorggi máhttinguovddáža sámeovttadaga plánejeaddjiin, erenomáš vástun sosiáladorvoáššit ja oktasašbargu Lappi buresveadjinguovlluin.
Lassedieđut:
Pia Ruotsala-Kangasniemi
hálddahushoavda
010 839 3106 / 040 726 2688
pia.ruotsala@samediggi.fi
Ida Pirttijärvi
bargiidhoavda
040 660 77 22
ida.pirttijarvi@samediggi.fi
Laura Morottaja
ekonomiijaplánejeaddji
040 677 2521
laura.morottaja@samediggi.fi
Riitta Lehtola-Kosonen
sosiála- ja dearvvasvuođačálli
044 777 4820
riitta.lehtola-kosonen@samediggi.fi
