Sämitige uđđâ stivrâ čokkânij vuossâmuu keerdi – Äššilistoost ovdâmerkkân EU-vaikuttem já sämmilij aalmugpeivi
Sämitige uđđâ stivrâ vuossâmuš čuákkim tollui Anarist vástuppeeivi 29.2.2024. Äššilistoost lâi eereeb iärrás EU-valjáid vaikuttem, sämmilij aalmugpeeivi ornim já stiivrâ čuákkimkielâ.
Sämitige stivrâ Sämitige ornijdemčuákkim ooleest 30.1.2024. Kooveest čižetpeln Asko Länsman, Inka Musta, Leo Aikio, Pirita Näkkäläjärvi, Tuomas Aslak Juuso, Karen-Anni Hetta já Tauno Ljetoff. Kove: Ville Fofonoff / Sämitigge
Sämitige stivrâ čokkânij Anarist vástuppeeivi 29.2. vuossâmuu čuákkimân uđđâ jesânijguin. Sämitige stivrâ kieđâvušâi čuákkimstis Sämitige mittomeerijd EU-valjâpajan 2024–2029. Savâstâlmijn pajanij oovdân eereeb iärrás sämmilij sajattuv já uásálistemmáhđulâšvuođâi nanodem EU:st já oovtâstpargo lasettem EU kuávlun.
– Mist lâi pyeri stiivrâ vuossâmuš čuákkim já peesâim tállân rähtiđ vuáváámijd. Eromâšávt EU-vaikuttem lii mijjân tehálâš fáddá taan valjâpaajeest. Lâi tehálâš peessâđ ton pargoost aalgân, ko EU-vaaljah láá jo kesimáánust. Vaikuttempargo kalga algâttiđ tääl, iätá saavâjođetteijee Pirita Näkkäläjärvi.
Stivrâ savâstâlâi čuákkimstis meid sämmilij aalmugpeeivi 6.2. orniimist já meridij orniđ sämmilij aalmugpeeivi juhle jyehi ive sierâ päikkikuudijn sämmilij päikkikuávlust. Stivrâ meridij, ete tot ij ornii sierâ valjâpaje lekkâmtilálâšvuođâ.
Stivrâ savâstâlâi čuákkimstis meid stiivrâ čuákkimkielân lohtâseijee vuáháduvâin já meridij čuákkimkielâ uásild, ete čuákkimijn puáhtá kevttiđ puoh kuulmâ Suomâst ellee sämikielâ já suomâkielâ. Stiivrâ čuákkimeh iä tulkkuu, jis tulkkâ ij onnuu ovdâmerkkân oovdânpyehtei sahâvuárui ääigi.
Sämitige stiivrâst láá čiččâm jesânid: saavâjođetteijee Pirita Näkkäläjärvi Anarist, I värisaavâjođetteijee, anarâš Leo Aikio Anarist, II värisaavâjođetteijee Tuomas Aslak Juuso Iänuduvâst, nuorttâlâš Tauno Ljetoff Anarist, Asko Länsman Ucjuuvâst, Karen-Anni Hetta Vuáčust já Inka Musta Helsigist. Stiivrâst láá ovdâstum puoh kulmâ Suomâst ellee sämikielâ (nuorttâlâš-, anarâš- já tavesämikielâ), puoh sämikuávlui kieldah sehe kaavpugsämmiliih.
Lasetiäđuh
Pirita Näkkäläjärvi
Saavâjođetteijee
044 7533 766
pirita.nakkalajarvi@samediggi.fi
