Sääʹmteeʹǧǧ ođđ halltõs noorõõđi vuõssmõs vuâra – Äʹššliist âʹlnn ouddmiârkkân EU-vaaiktummuš da saaʹmi meersažpeiʹvv

Sääʹmteeʹǧǧ halltõs noorõõđi Aanrest piâtnâc 29.2. vuõssmõs såbbrasas ođđ norrõõzzin. Sääʹmteeʹǧǧ halltõs ǩiõttʼtõõli såbbreʹstes Sääʹmteeʹǧǧ täävtõõzzid EU-vaalpâjja 2024–2029. Saǥstõõllmõõžžin käggji jeeʹrab mieʹldd säʹmmlai sââʹj da vuässõõttâmvueiʹttemvuõđi raavummuš EU:st da õhttsažtuâj pueʹrummuš EU årra.

– Meeʹst leäi šiõǥǥ halltõõzz vuõssmõs sååbbar da piâzzim tâʹlles tueʹjjeed plaanid. Jeäʹrben EU-vaaiktummuš lij miʹjjid tääʹrǩes teeʹmmen tän  vaalpââʹjest. Leäi šiõǥǥ piâssâd aʹlǧǧe tõn tuâjast, ǥu EU-vaal lie juʹn ǩieʹssmannust. Vaaiktemtuâj âlgg altteed ååʹn, särnn saaǥǥjååʹđteei Pirita Näkkäläjärvi.

Halltõs saǥstõõli såbbrest še saaʹmi meersažpeeiʹv 6.2. jäʹrjstummšest da tuʹmmii jäʹrjsted saaʹmi meersažpeeiʹv juuʹhl eeǥǥlânji jeeʹres paaiʹǩin säʹmmlai dommvuuʹdest. Halltõs tuʹmmii leeʹd jäʹrjsteǩâni jeeʹrben vaalpââʹj ääʹveempoodd.

Halltõs saǥstõõli såbbrest še halltõõzz sååbbarǩiõʹlle kuulli vuõʹjjin da tuʹmmii sååbbarǩiõl kuõskeeʹl, što såbbrin vueiʹtet ââʹnned pukid koolm Lääʹddjânnmest jieʹlli sääʹmǩiõl da lääʹdd. Halltõõzz såbbrid jeäʹt tuʹlǩǩuku, jõs jeäʹt tuulk taarbšuku ouddmiârkkân valmštõõllʼji saakkvuârai ääiǥas.

Sääʹmteeʹǧǧ halltõõzzâst lie čiččâm vuäzzliʹžžed: saaǥǥjååʹđteei Pirita Näkkäläjärvi Aanrest, I väärrsaaǥǥjååʹđteei, aanarsäʹmmlaž Leo Aikio Aanrest, II väärrsaaǥǥjååʹđteei Tuomas Aslak Juuso Jeänõõǥǥâst, nuõrttsäʹmmlaž Tauno Ljetoff Aanrest, Asko Länsman Uccjooǥǥâst, Karen-Anni Hetta Vuâččast da Inka Musta Heʹlssnest. Halltõõzzâst lie eeʹttkõsttum puk kolmm Lääʹddjânnmest jieʹlli sääʹmǩiõl (nuõrtt-, aanar- da tâʹvvsääʹmm), puki sääʹmvuuʹd kooʹddi vuuʹd di gååradsäʹmmla.

Lââʹssteâđ
Pirita Näkkäläjärvi
Saaǥǥjååʹđteei
044 7533 766
pirita.nakkalajarvi@samediggi.fi