Sámedikki ođđa stivra čoahkkanii vuosttas háve – Áššelisttás ovdamearkan EU-váikkuheapmi ja sámi álbmotbeaivi
Sámedikki ođđa stivrra vuosttas čoahkkin dollojuvvui Anáris bearjadaga 29.2.2024. Áššelisttás ledje earret eará EU-váikkuheapmi, sámi álbmotbeaivve ordnen ja stivrra čoahkkingiella.
Sámedikki ođđa stivra Sámedikki ortniiduvvančoahkkima oktavuođas 30.1.2024. Govas gurut ravddas Asko Länsman, Inka Musta, Leo Aikio, Pirita Näkkäläjärvi, Tuomas Aslak Juuso, Karen-Anni Hetta ja Tauno Ljetoff. Govva: Ville Fofonoff / Sámediggi
Sámedikki stivra čoahkkanii Anáris bearjadaga 29.2. vuosttas čoahkkimii ođđa čoahkkáibijuin. Sámedikki stivra gieđahalai čoahkkimis Sámedikki mihttomeriid EU-válgabadjái 2024–2029. Ságastallamiin badjánedje ovdan earret eará sámiid sajádaga ja oassálastinvejolašvuođaid nannen EU:s ja oktasašbarggu deahtisteapmi EU:a guvlui.
– Mis lei stivrra buorre vuosttas čoahkkin ja beasaimet dalán bargat plánaid. Erenomážit EU-váikkuheapmi lea midjiide dehálaš temá dán válgabaji áigge. Lei dehálaš beassat dán barggus álgui, daningo EU:a válggat leat jo geassemánus. Váikkuhanbarggu ferte álggahit dál, dadjá ságajođiheaddji Pirita Näkkäläjärvi.
Stivra ságastalai čoahkkimis maiddái sámi álbmotbeaivve 6.2. ordnemis ja šiehtai, ahte sámi álbmotbeaivvi doalut lágiduvvojit jahkásaččat ain sierra báikegottiin sámiid ruovttuguovllus. Stivra mearridii, ahte ii ordne sierra válgabaji rahpandilálašvuođa.
Stivra ságastalai čoahkkimis maiddái geavadiin, mat laktásit čoahkkingillii, ja mearridii čoahkkingiela buohta, ahte čoahkkimiin lea vejolaš geavahit buot golbma Suomas ealli sámegiela ja suomagiela. Stivrra čoahkkimat eai tulkojuvvo, jos ii tulka dárbbašuvvo ovdamearkan áššemeannudeaddjiid sáhkavuoruid áigge.
Sámedikki stivrras leat čieža lahtu: ságajođiheaddji Pirita Näkkäläjärvi Anáris, I várreságajođiheaddji, anáraš Leo Aikio Anáris, II várreságajođiheaddji Tuomas Aslak Juuso Eanodagas, nuortalaš Tauno Ljetoff Anáris, Asko Länsman Ohcejogas, Karen-Anni Hetta Vuohčus ja Inka Musta Helssegis. Stivrras leat ovddastuvvon buot golbma Suomas ealli sámegiela (nuortalaš-, anáraš- ja davvisámegiella), sámeguovllu buot gielddaid guovllut ja maiddái gávpotsápmelaččat.
Lassidieđut
Pirita Näkkäläjärvi
Ságajođiheaddji
044 7533 766
pirita.nakkalajarvi@samediggi.fi
