Sämitigge ceelhij Tiänu kuálástemnjuolgâdusâst - njuolgâdus ij koolgâ vuáláčäälliđ, pic ráđádâllâđ uđđâsist
Iävtuttum Tiänujuuvâ kuálástemnjuolgâdus luávkkáá sämmiláid vuáđulaavâst torvejum vuoigâdvuođâid nuuvt merhâšittee vuovijn, ete ton ij koolgâ vuáláčäälliđ. Sämitigge iävtut, ete kuálástemnjuolgâdus ráđádâlloo uđđâsist. Sämitigge haldâttâs meridij Tiänu kuálástemnjuolgâdusân kyeskee ciälkkámušâst 5.9.2023.
Ciälkkámušâst leijee Tiänu kuálástemnjuolgâdushammiittâs luávkkáá sämikulttuur syeje, sämmilij omâdâhsyeje sehe jiešmeridemvuoigâdvuođâ. Hammiittâsâst ij meiddei lah sämmilij rijjâ, tiätun vuáđuduvvee ovdâmiettâm. Sämitige mieldi kuálástemnjuolgâdusâst kalga ráđádâllâđ uđđâsist.
– Statârääđi adelij ráđádâllâmkode asâttem ohtâvuođâst ciälkkámuš, mii tiäduttij luosânaalij iällám turvâstem sehe sämmilij vuoigâdvuođâi ovdedem. Sämmilij vuoigâdvuođah láá kuittâg hilgom kuálástemnjuolgâdushammiittâsâst, ijge Sämitigge pyevti tuhhiittiđ njuolgâdus taan häämist, iätá Sämitige saavâjođetteijee Tuomas Aslak Juuso.
Kuálástemnjuolgâdushammiittâs iästá keevâtlávt Tiänu kuávlu sämmilij vuoigâdvuođâ hárjuttiđ ärbivuáválâš kuálástem Tiänu čácáduvvâst. Njuolgâdus ucceed merhâšittee vuovvijn sämikielâ luándulâš kevttimpirrâs já uhked uásild kiävhudittiđ sämikielâ luosâpiivdon lohtâseijee terminologia sehe tom mield sirdâšuvvee ärbivuáválâš tiäđu.
Hammiittâsâst ij lah valdum huámmášumán vorâs riehtivuáháduv já vuáđulaavâ
Kuálástemnjuolgâdushammiittâsâst ij lah tuárvi valdum huámmášumán algâaalmug sämmilij vuáđu- já olmoošvuoigâdvuođâid, ijge taid lohtâseijee vuáđulahâváljukode uáivilijd. Njuolgâdusâst ij meiddei lah valdum huámmášumán majemušáigásâš riehtivuáháduvvâst porgum linjiimijd sämmilij kuálástemvuoigâdvuođâin já sämikulttuur hárjuttem syejeest Tiänujuuvâ čácáduvvâst.
Alemus riehti lii ive 2022 adelâm ovdâmeridemijn (AR:2022:25 já AR:2022:26) kuáđđám heiviithánnáá kuálástem Tiänujuuvâ čácáduvvâst kyeskee asâttâsâid vuáđulaavâ vuástásâžžân. Njuolgâdusâin teikkâ tom valmâštâllâm ohtâvuođâst ij lah iävtuttum vuáđustâsâid toos, ete ääših láá čovdum kuálástemnjuolgâdusâst nubenáál ko alemus rievti čuávduseh väätih.
– Lii čielgâs, ete vuáđulaavâ já vorâs riehtivuáháduv huámmášumettáá kyeđđim kuálástemnjuolgâdusâst tuálvu toos, ete maaŋgah njuolgâdus raijiittâsah láá sämmilij uásild pehtilettummeh, tane toh láá vuáđulaavâ vuástásiih. Tággáár hiäjus tääsi valmâštâllâm ij lah kiängin uásipele hiätu, juátká Sämitige I värisaavâjođetteijee Anni Koivisto.
Eennâm- já meccituáluministeriö táátui Sämitiggeest ciälkkámuš hammiittâsâst Suomâ já Taažâ koskâsâš Tiänujuuvâ čácáduv kuálástemnjuolgâdusâst já tom vuáláčälimist. Kuálástemnjuolgâdus lii ive 2007 čonnum Tiänu kuálástemsopâmuš lahtos, moin stivriđ kuálástem Tiänujuuvâst, já mon peividuvvojeh 5–7 ive ääigi.
Ive 2023 ääigi Sämitigge já Tiänu kyelituálukuávlu iä innig uásálistám kuálástemnjuolgâdusân kyeskee ráđádâlmáid, tastko keččii ráđádâllâmiävtui epiluhostum Taažâ staatâ iävtuttes luosâkiälduvátámuš tiet.
Lasetiäđuh:
Tuomas Aslak Juuso
Saavâjođetteijee
040 687 3394
tuomas.juuso@samediggi.fi
Anni Koivisto
I värisaavâjođetteijee
040 415 5969
anni.koivisto@samediggi.fi
Sarita Kämäräinen
Iäláttâs- já pirâslahâčällee
040 186 7258
sarita.kamarainen@samediggi.fi
Kove: Hans Pieski
