Sämitigge haalijd kuhesáigásijd čuávdusijd kielâpiervâltooimâ turviimân – ij vääldi kielâpiervâltooimâ ornimnáál
Sämitige stivrâ kieđâvušâi čuákkimistis 2.-3.12.2019 kulttuur- já kielâpiervâltooimâst rahtum riävtálii čielgiittâs já koččâmuš kielâpiervâltooimâ orniimist já pyevtitmist. Sämitige stivrâ meridij čuákkimistis vuáváámijn sämmilii kulttuur- já kielâpiervâltooimâ uánihis já kuhes äigikooskâ oovdedmân.
Sämitigge lii finnim valmâšin čielgiittâspargo, mon váldupargon lâi selvâttiđ, ete moi vuovijguin já iävtuiguin kulttuur- já kielâpiervâltooimâ puávtáččii sirdeđ Sämitige ornimnáál. Taat lii valdum ulmen Sämitige taan valjâpaje poolitlijn toimâohjelmijn. Meid Aanaar já Suáđigil kieldah oovtâst Anarâškielâ servijn láá alguustis oovdânpuáhtám, ete Sämitigge váldá kulttuur- já kielâpiervâltooimâ ornimnáál.
Ohtâ tooimâ stuárráámus hástu lii tot, ete kiän ovdâsvástádâs sämmilâš kulttuur- já kielâpiervâltoimâ lii. Čielgiittâs mield muulsâiähtun kolgâččii-uv suogârdiđ háástui čuávdim kuhheeb äigikooskâst vâi torvejuvvoo kielâpiervâltooimâ pisovâšvuotâ, kvaliteet já toimâmvisesvuotâ. Čielgiittâs puátusijn tiättoo meid, ete vyeimist orroo arâšoddâdemlaavâ mield Sämitigge ij pyevti toimâđ kielâpiervâlpalvâlusâi uárnejeijen nuuvt ko kieldah pyehtih. Kielâpiervâltooimâ pyevtittem kieldáid Sämitige tooimâst váđáččij, ete Sämitigge vuáđudičij alnestis sierâ priivaatriävtálii tuáimee. Čielgiittâsâst oovdânpuohtum muulsâiävtuh väätih kuittâg täärhib árvuštâllâm já laseresursijd.
Sämitigge lii tuđâvâš kielâpiervâltooimâ šoddâmân já ton puátusáid kielâiäláskitmist. Suomâ staatâ toorjâ kielâpiervâltooimân lii lamaš merhâšittee já toohâm máhđulâžžân ton šoddâm já šiev puátusijd. Tääl kalga kuittâg selvâttiđ, ete magarijd nubástusâid kielâpiervâltooimâ fastâdem váátá lahâaasâtmân já toimâráhtusáid, vâi ton šiev puátusijd puáhtá puátteevuođâst-uv turviđ.
”Kielâpiervâltoimâ lii eromâš tehálâš já mun tuáivum, ete tááláá tuáimeeh pasteh juátkiđ, tassaaš ko mist láá kuhesáigásiih čuávduseh tilán. Mun tuáivum, ete táárbu mield kieldah kyeddih ovdâsvástádâs kielâpiervâltooimâ jotkuuvâšvuođâst”, iätá Sämitige saavâjođetteijee Tiina Sanila-Aikio.
Sämitige stivrâ oovdânpuáhtá, ete uássin máttááttâs- já kulttuurminister vuáđudem sämikielâi já sämikielâlii máttááttâs ovdedemjuávhu ráhtoo sämmilii arâšoddâdem sehe sämmilii kulttuur- já kielâpiervâltooimâ kiäinukárttá. Kárttáást miäruštâlâččii tooimâ kuhesáigásijd uulmijd já toi vaattâm tooimâid. Siämmást Sämitige stivrâ oovdânpuáhtá Sämitige ive 2020 toimâvuáváámân, ete tot juátká selvâttempargo tast, puáhtá-uv Sämitigge toimâđ kielâpiervâlpalvâlusâi uárnejeijen.
Kove: Ville-Riiko Fofonoff / Sámediggi
Lasetiäđuh:
Sämitige saavâjođetteijee Tiina Sanila-Aikio puh. 050 300 1780, tiina.sanila-aikio(at)samediggi.fi
Kielâtorvočällee Anne Kirste Aikio puh. 040 707 5626, anne-kirste.aikio(at)samediggi.fi
Ovdâčielgiittâshaavâ vuávájeijee, Piia Nuorgam puh. 040 623 3341, piia.nuorgam(at) samediggi.fi
