Sämitigge kollij Helsigist sämmilij soti-palvâlussáid kyeskee teivâdmijn
Sämitige delegaatio kollij Helsigist 15.– 16.5.2024 eromâšávt sämmilij sosiaal- já tiervâsvuođâpalvâlussáid lohtâseijee koččâmušâi ooleest. Koskoho 15.5. Sämitigge já Kela teivii oovtâstpargoráđádâlmij ooleest. Oovtâstpargoráđádâlmijn lijjii oovdâst vijđes äššiolesvuođah, main lii soppum ornijduumij koskâsii oovtâstpargosopâmušâst. Teivâdmist eereeb iärrás soppii ohtsii valmâštâlmist, mii kuáská Kela vuáváámân säämi kielâlaavâ mittomeerij olášume várás, savâstâllii vajodittemhaavâst, mon ovdedem lii vuálgám joton oovtâst vuottum táárbu vuáđuld sehe vuávájii viestâdemoovtâstpargo, mon ulmen lii movtijdittiđ sämikielâlij palvâlusâi kevttimân.
– Merikoskâsâš oovtâstpargo lii tehálâš, vâi mij pyehtip oovtâst čuávvuđ já ovdediđ sämmilij vuoigâdvuođâi olášume sosiaaltorvo olášutmist. Eromâšávt mun ilodâm tast, ete mij pyehtip tain ráđádâlmijn sooppâđ toimâvuáváámist, mii stivree konkreetlávt pargo sämmilij palvâlusâi pyerrin, paahud Sämitige II värisaavâjođetteijee Tuomas Aslak Juuso.
Sämitigge teeivâi 15.5. meid sosiaaltorvokomitea I värisaavâjođetteijee Liisa Siika-aho sosiaal- já tiervâsvuođâministeriöst. Siika-ahoin savâstâllii eereeb iärrás sämmilij huámmášumán väldimist sosiaaltorvouđâsmitmist já Sämitige uásálâšvuođâst sosiaaltorvokomiteast.
Tuorâstuv 16.5. teivâdmáid kullii sosiaaltorvominister Sanni Grahn-Laasosii teivâm, sosiaal- já tiervâsvuođâminister Kaisa Juuso sierânâsišedeijee Hannu Peurasaari teivâm sehe teivâm Väestöliittoin.
Sosiaaltorvominister Grahn-Laasosii teivâdem fáddán lâi ovdâmerkkân sämmilij sosiaaltorvo ovdedem, eromâšávt puásuituállei sajasâšiševuáhádâh.
– Mun lam tuđâvâš, ete sosiaaltorvominister Grahn-Laasonen čaaitij ibárdâs puásuituállei sajasâšiše ovdedemtárboid já mun tuáivum, ete taat meid joođeet Suomâ haldâttâs jotelis toimáid sajasâšiše pyereedmân. Puásuituállei sajasâšiševuáháduv kolgâččii ovdediđ tienuuvt, ete tot västidičij tuođâlii táárbun já ovdedičij oovtviärdásâšvuođâ, paahud Tuomas Aslak Juuso.
Sosiaal- já tiervâsvuođâminister Juuso sierânâsišedeijee Hannu Peurasaarijn savâstâllii sämmilij soti-palvâlusâi äigikyevdilijn aašijn tego soti-palvâlusâi ruttâdmist, sämikielâlij pargei finniimist sehe eromâšávt párnái já elilâmulmui palvâlusâin. Lasseen oovdâst lâi tárbu visásmittiđ sämmilii psykososiaallii torjuu ohtâduv Uvjj – Uvjâ – Uvja tooimâ juátkim. Väestöliittoin savâstâllii sämmilii peerâpoolitlii strategiast já eres máhđulii oovtâstpargoost.
Sämitige delegaatiost lijjii II värisaavâjođetteijee Tuomas Aslak Juuso, Sämitige jeessân já sosiaal- já tiervâsvuođâlävdikode saavâjođetteijee Leena Niittyvuopio-Jämsä, sosiaal- já tiervâsvuođâčällee Riitta Lehtola-Kosonen, vs. sosiaal- já tiervâsvuođâčällee Anni Koivisto, kielâtorvočällee Anne Kirste Aikio, vs. iäláttâsčällee Maria Valkeapää já Poske sämiohtâduv vuávájeijee Darija Semenoja.
Lasetiäđuh:
Tuomas Aslak Juuso
II värisaavâjođetteijee
040 687 3394
tuomas.juuso@samediggi.fi
