Sámediggi galledii Helssegis sámiid sode-bálvalusaid guoski deaivvademiin
Sámedikki delegašuvdna galledii Helssegis 15.-16.5.2024 erenoamážit sámiid sosiála- ja dearvvasvuođabálvalusaide guoski gažaldagaid oktavuođas. Gaskavahko 15.5. Sámediggi ja Kela deaivvadedje oktasašbargoráđđádallamiid olis. Oktasašbargoráđđádallamiin gieđahallojedje viiddes áššeoppalašvuođat, main lea sohppon organisašuvnnaid gaskasaš oktasašbargosoahpamušas. Deaivvadeamis earret eará sohppui oktasaš válmmaštallamis guoskkadin Kela plána sámi giellalága mihttomeriid ollašuhttima várás, ságastallui veajuiduhttinprošeavttas, man ovddideapmi lea álgán ovttas gávnnahuvvon dárbbu vuođul sihke plánejuvvui diehtojuohkima oktasašbarggus, man dárkkuhussan lea movttiidahttit olbmuid geavahit sámegielat bálvalusaid.
– Fásta oktasašbargu lea dehálaš, danin vuoi bastit ovttas čuovvut ja ovddidit sámiid vuoigatvuođaid ollašuvvama sosiáladorvvu ollašuhttimis. Erenomážit illudan das, ahte basttiimet daid ráđđádallamiin soahpat doaibmabidjoplánas, mii láidesta konkrehtalaččat barggu sámiid bálvalusaid buorrin, gávnnaha Sámedikki II várreságajođiheaddji Tuomas Aslak Juuso.
Sámediggi deaivvadii 15.5. maiddái sosiáladorvokomitea I várreságajođiheaddji Liisa Siika-ahoin sosiála- ja dearvvasvuođaministeriijas. Siika-ahoin ságastallui earret eará sámiid vuhtiiváldimis sosiáladorvoođastusas ja Sámedikki oassálastimis sosiáladorvokomiteai.
Duorastaga 16.5. deaivvademiide gulle sosiáladorvoministtar Sanni Grahn-Laasosiin deaivvadeapmi, sosiála- ja dearvvasvuođaministtar Kaisa Juuso spesiálaveahkkebargi Hannu Peurasaariin deaivvadeapmi sihke deaivvadeapmi Väestöliittoin.
Sosiáladorvoministtar Grahn-Laasosiin deaivvadeami áššit ledje sámiid sosiáladorvvu ovddideapmi, erenomážit badjeolbmuid sadjásašveahkkevuogádat.
– Lean duđavaš, ahte sosiáladorvoministtar Grahn-Laasonen orui áddemin badjeolbmuid sadjásašveahki ovddidandárbbu ja sávan, ahte dat maiddái jođálmahttá Suoma ráđđehusa doaimmaid sadjásašveahki buorideapmin. Badjeolbmuid sadjásašveahkkevuogádaga galggašii ovddidit nu, ahte dat vástidivčče duođalaš dárbui ja ovddidivčče ovttaveardásašvuođa, gávnnaha Tuomas Aslak Juuso.
Sosiála- ja dearvvasvuođaministtar Juuso spesiálaveahkkebargi Hannu Peurasaariin ságastallui sámiid sode-bálvalusaid áigeguovdilis áššiin nugo sode-bálvalusaid ruhtadeamis, sámegielat bargiid oažžumis sihke erenomážit mánáid ja ahkeolbmuid bálvalusain. Dan lassin lei dárbu sihkkarastit sámiid psykososiálalaš doarjaga ovttadaga Uvjj – Uvjâ – Uvja doaimma joatkašuvvama. Väestöliittoin ságastallui sámi bearašpolitihkalaš strategiijas ja eará vejolaš oktasašbarggus.
Sámedikki delegašuvdnii gulle II várreságajođiheaddji Tuomas Aslak Juuso, Sámedikki lahttu ja sosiála- ja dearvvasvuođalávdegotti ságajođiheaddji Leena Niittyvuopio-Jämsä, sosiála- ja dearvvasvuođačálli Riitta Lehtola-Kosonen, vs. sosiála- ja dearvvasvuođačálli Anni Koivisto, gielladorvočálli Anne Kirste Aikio, vs. ealáhusčálli Maria Valkeapää ja Poske sámeovttadaga plánejeaddji Darija Semenoja.
Lassedieđut:
Tuomas Aslak Juuso
II várreságajođiheaddji
040 687 3394
tuomas.juuso@samediggi.fi
