Sääʹmteʹǧǧ Heʹlssnest sääʹm soti-kääzzkõõzzid kuõskki kaaunõõttmõõžžin
Sääʹmteeʹǧǧ delegaatio jieʹli Heʹlssnest 15.–16.5.2024 jeäʹrben sääʹm sosiaal- da tiõrvâsvuõttkääzzkõõzzid kuulli kõõččmõõžživuiʹm. Seärad 15.5. Sääʹmteʹǧǧ da Kela kaaunõʹtte õhttsažtuâjjsaǥstõõllmõõžži diõtt. Õhttsažtuâjjsaǥstõõllmõõžžin saǥstõʹlleš veiddsõs äʹššobbvuõđi diõtt, koin lij suåppum organisaatioi kõskksaž õhttsažtuâjjsuåppmõõžžâst. Kaaunõõttmõõžžâst jeeʹrab mieʹldd sueʹppeš õhttsaž valmštõõllmest kuõskeeʹl Kela plaan sääʹm ǩiõll-lääʹjj täävtõõzzi tieuʹddma, saǥstõʹlleš säursmâʹttemhaʹŋǩǩõõzzâst, koonn õõudâsviikkmõš lij jåttjam õhttsânji tobdstum taarb vuâđald di plaaneeš õhttsažtuâj saaǥǥtummšest, koonn jurddjen lij älšmâʹtted ââʹnned sääʹmǩiõllsaid kääzzkõõzzid.
– Õhttsažtuâjj mieʹrrkõõski kaʹnnat, što pâʹsttep õõutveäkka seuʹrrjed da õõuʹdeed säʹmmlai vuõiggâdvuõđi teâuddjummuž sosiaalstaan tåimmapiijjmest. Muʹnne rämm aainâs lij, što pâʹsttep täin saǥstõõllmõõžžin suåppâd tåimmplaanâst, kååʹtt konkreettlânji ohjjad tuâj sääʹm kääzzkõõzzi pueʹrren, tuâtt Sääʹmteeʹǧǧ II väärrsaaǥǥjååʹđteei Tuomas Aslak Juuso.
Sääʹmteʹǧǧ kaaunõõđi še sosiaalstaankomitea I väärrsaaǥǥjååʹđteei Liisa Siika-ahoin sosiaal- da tiõrvâsvuõttministeriast. Siika-ahoin 15.5. saǥstõʹlleš jeeʹrab mieʹldd säʹmmlai lokku välddmõõžž sosiaalstaanoođõõzzâst da Sääʹmteeʹǧǧ vuässadvuõđâst sosiaalstaankomiteast.
Nelljdpeeiʹv 16.5. kaaunõõttmõõžžid kuʹlle sosiaalstaanministeeʹr Sanni Grahn-Laasonen kaaunõõttmõš, sosiaal- da tiõrvâsvuõttministeeʹr Kaisa Juuso spesiaalvieʹǩǩteei Hannu Peurasaari kaaunõõttmõš di kaaunõõttmõš Väestöliittoin.
Sosiaalstaanministeeʹr Grahn-Laasonen kaaunõõttmõõžžâst äʹššen leʹjje säʹmmlai sosiaalstaan õõudâsviikkmõš, aainâs puäʒʒhåiddji sâjjsažveäʹǩǩriâšldõk.
– Leäm toođvaž, što sosiaalstaanministeeʹr Grahn-Laasonen fiʹttji puäʒʒhåiddji sâjjsažvieʹǩǩ õõuʹdeemtaarbid da tuäivam, što tät še veekk Lääʹdd halltõõzz jåʹttlõs tååimaid sâjjsažvieʹǩǩ pueʹreem õuʹdde. Puäʒʒhåiddji sâjjsažveäʹǩǩriâšldõõǥǥ õõlǥči pueʹreed nuʹtt, što tõt vaʹstteʹči tuõtt taʹrbbe da viiǥǥči õõudâs õõutverddsažvuõđ, särnn Tuomas Aslak Juuso.
Sosiaal- da tiõrvâsvuõttminister Juuso spesiaalvieʹǩǩteei Hannu Peurasaarin saǥstõʹlleš sääʹm soti-kääzzkõõzzi ääiʹjpoddsaž aaʹššin mâʹte soti-kääzzkõõzzi teäggtõõzzâst, sääʹmǩiõllsa tuâjjlažkååʹdd vuäǯǯamvuõđâst di jeeʹrben päärnai da ââʹǩǩoummi kääzzkõõzzin. Äʹššen leäi lââʹssen tarbb ainsmâʹtted sääʹm psykososiaalʼlaž tuärj juâkkaz Uvjj – Uvjâ – Uvja toiʹmmjem juätkkjummuš. Väestöliittoin saǥstõʹlleš sääʹm piârpoliittlaž strategia pirr da vueiʹtlvaž jeeʹres õhttsažtuâjast.
Sääʹmteeʹǧǧ delegaatiost leʹjje II väärrsaaǥǥjååʹđteei Tuomas Aslak Juuso, Sääʹmteeʹǧǧ vuäzzlaž da sosiaal- da tiõrvâsvuõttluʹvddkååʹdd saaǥǥjååʹđteei Leena Niittyvuopio-Jämsä, sosiaal- da tiõrvâsvuõttpiisar Riitta Lehtola-Kosonen, vs. sosiaal- da tiõrvâsvuõttpiisar Anni Koivisto, ǩiõllstaanpiisar Anne Kirste Aikio, vs. jieʹllemvueʹǩǩpiisar Maria Valkeapää da Poske sääʹmjuâkkaz plaanni Darija Semenoja.
Lââʹssteâđ:
Tuomas Aslak Juuso
II väärrsaaǥǥjååʹđteei
040 687 3394
tuomas.juuso@samediggi.fi
