Sämitigge ocá meriáigásii proojeektpargee Sämityeji Akatemia (Duodji Akatemia) -ovdâčielgiittâshaahân

Proojeektpargee pargon lii valmâštâllâđ hahâucâmuš Duodji Akatemia -haavâst. Duodji Akatemia -haavâ mittomeerrin lii huksiđ viärmáduvâid sämituáijárij kooskâ, ovdediđ oovtâstpargo raajij rasta sämityeje ooleest, tuárjuđ já turviđ sämituáján lohtâseijee ärbivuáválii tiäđu sirdâšum suhâpuolvâst nuubán sehe suoijiđ sämityeje sajattuv sämmilii kulttuuräärbi uássin. Pargee pargoid kulá hahâucâmuš valmâštâllâm várás nuurrâđ tiädu, čäälliđ ucâmuš sehe toollâđ ohtâvuođâ já valmâštâllâđ haavâ oovtâst kuoimijguin Taažâst já Suomâst sehe karttiđ máhđulijd hahâkuoimijd Ruotâst.

Pargo álgáččij tállân já pištá 31.8.2024 räi. Pargo lii uásiáigásâš, 60–70 % olespargoääigist. Pargo lii máhđulâš porgâđ káiduspargon.

Tohálâšvuođâiähtun lii tooimâ vaattâm hiäivulâš škovlim já sämikielâ máttu (asâttâs 1727/95). Mij anneep áárvust naavcâid jiečânâs já huolâlii porgâmân, šiev oovtâstpargo- já vuáruvaikuttâstááiđuid, hárjánem proojeektpargoost sehe čielgâ kirjálii viestâdemtááiđu. Pargo miänástuvvee hoittám váátá sämmilij ärbivuáválii kietâtyeje tubdâm sehe naavcâid aalmugijkoskâsii oovtâstpaargon.

Pälkki miärášuvá Sämitige pälkkivuáháduv vátávâšvuotâtääsi V/II mield (vuáđupälkki olespargoääigist 2432,19 eurod/mp). Vuáđupäälhi lasseen pargoost máksojeh 24 % sämikuávlu lase sämikuávlust porgâdijn já pargohárjánem mield miärášuvvee hárjánemlaseh.

Rijjâhámásâš uuccâmreeivâ sehe máhđulâš ánsuluvâttâllâm já eres lahtosijd kalga toimâttiđ Sämitige čäällimkoodán majemustáá 9.5.2024 taan uuccâmluámáttuv peht (lekkâs uđđâ laasân).

Sämitigge lii finnim Duodji Akatemia -ovdâčielgiittâshaahân Interreg Aurora hahâruttâdem 17 500 e.

Lasetiäđuid pargoost addel haldâttâhhovdâ Pia Ruotsala-Kangasniemi,pia.ruotsala@samediggi.fi

Sämitige tooimân puáhtá uápásmuđ nettičujottâsâst www.samediggi.fi.

Anarist 25.4.2024
Sämitigge