Sámediggi ohcá mearreáigásaš prošeaktabargi Duodjeakademiija -ovdačielggadanfidnui

Prošeaktabargi bargun lea válmmaštallat fidnoohcamuša Duodjeakademiija -fidnus. Duodjeakademiija -fitnu ulbmilin lea veahkehit duojáriid gávnnadit, álkidahttit duodjeovttasbarggu riikkarájáid rastá, doarjut ja sihkkarastit duodjeárbevieruid sirdašuvvama buolvvas bulvii ja suodjalit duoji sápmelaš kulturárbbi oassin. Bargui gullá dieđu čohkken ohcamuša válmmaštallama várás, ohcamuša čállin, gulahallan ja fitnu válmmaštallan ovttas Norgga ja Suoma fidnoguimmiiguin, ja maiddái vejolaš fidnoguimmiid ohcan Ruoŧas.

Bargu álggášii dalán ja dat bistá 31.8.2024 rádjai. Bargu lea oasseáiggis, 60-70 % ollesbargoáiggis. Barggu sáhttá bargat maiddái gáiddusin.

Gelbbolašvuođagáibádussan lea barggu dáfus heivvolaš skuvlejupmi ja sámegiel máhttu (ásahus 1727/95). Mii atnit árvvus iešheanalaš ja fuolalaš bargovuogi, buriid ovttasbargo- ja gulahallandáidduid, hárjánumi prošeaktabargguin ja čielga čálalaš gulahallandáidduid. Barggu ceavzilis dikšun gáibida dan ahte duodjekultuvra lea dutnje oahpis ja ahte nagodat ovttasbargat maiddái riikkaidgaskasaččat.

Bálká Sámedikki bálkávuogádaga gáibádusdási V/II mielde (vuođđobálká ollesáiggebarggus 2432,10 euro/mb). Vuođđobálkká lassin máksojuvvojit sámeguovllus barggadettiin 24 % sámeguovllu lassi ja ahkelasit bargohárjánumi mielde.

Friija ohcamušreivve ja vejolaš ánsologahallama ja eará mildosiid bivdit doaimmahit Sámedikki čállingoddái maŋimustá 9.5.2024 dán ohcanskovi bokte (rahpasa ođđa ruvttui).

Sámediggi lea ožžon Duodjeakademiija -ovdačielggadanfidnui Interreg Aurora fidnoruhtadeami 17 500 e.

Lassedieđuid barggus addá Pia Ruotsala-Kangasniemi, pia.ruotsala(at)samediggi.fi

Sámedikki doaimmaide sáhtát oahpásmuvvat čujuhusas www.samediggi.fi.

Anáris 25.4.2024
Sámediggi