Sämitigge teeivâi staatârääđi ovdâsteijeid Helsigist
Sämitige delegaatio teeivâi taan ohhoost saavâjođetteijei jođettâsâst staatârääđi ovdâsteijeid vâi pyehtih savâstâllâđ haldâttâsohjelm siskáldâsâst sämmilij uásild. Orpo haldâttâs lii haldâttâsohjelmstis čonâdâttâm ovdediđ ovdedeijee vuárusavâstâllâm já oovtâstpargo sämmilijguin. Ulmen lii, ete teivâmeh puoh ministerijguin olášuveh tállân haldâttâspaje algâmuddoost.
Koveh: Sämitigge / Niina Siivikko.
Oho ääigi Sämitige delegaatio teeivâi olgominister Elina Valtosii (kok), sosiaaltorvominister Sanni Grahn-Laasosii (kok), riehtiminister Leena Meri (VS) sehe staatâčällee Risto Artjoki (kok). Sierâ teivâmijn savâstâllii ei. sämitiggelaavâ uđâsmitmist, sämmilij oovdâstmist Euroop unionist sehe sämmilijn sosiaaltorvouđâsmitmist. Toos lasseen kieđâvuššii ovdâmerkkân puásuituállei sajasâšiševuáháduv hástusijd sehe Tiänu tile.
– Mij savâstâlâim teivâmijn ennuv meid sämitiggelaavâ 9 § miäldásii ráđádâllâmkenigâsvuođâ olášuumeest sierâ ministeriöin, muštâl saavâjođetteijee Tuomas Aslak Juuso.
Pyeri oovtâstpargo tehálâš algâttiđ tállân
Sämitigge tuáivu, ete teivâmeh puoh ministerijguin luhostuveh forgâpalij.
– Lii tehálâš, ete ministereh kävnih tai teivâmij várás ääigi tievâ kalenderijnis, amahân sämmilij ääših kuleh masa jyehi minister suárgán monniináál, paahud saavâjođetteijee Juuso. – Mij lep meid povdim ministerijd Anarân uápásmuđ pääihi alne sämikulttuurân já paargon, maid mij porgâp Sämitiggeest, já taah kolliistâlmeh láá-uv jo puátimin, Juuso juátká.
Staatârääđi teivâmij lasseen Sämitige ovdâsteijeeh uásálistii sämitiggelaavâ 9 § miäldásáid ráđádâlmáid ovdâmerkkân eennâm- já meccituáluministeriöst puásuivaahâglaavâ olášume háárán. Delegaation kullii oho ääigi saavâjođetteijee Tuomas Aslak Juuso, I värisaavâjođetteijee Anni Koivisto, II värisaavâjođetteijee Leo Aikio, iäláttâs- já vuoigâdvuotâlävdikode saavâjođetteijee Asko Länsman, lahâčällee Kalle Varis, iäláttâs- já pirâslahâčällee Sarita Kämäräinen, sosiaal- já tiervâsvuođâčällee Kaisa Ruokojärvi sehe saavâjođetteijee išedeijee Niina Siivikko.
Lasetiäđuh:
Tuomas Aslak Juuso
Saavâjođetteijee
040 687 3394
tuomas.juuso@samediggi.fi
