Sámediggi deaivvadii stáhtaráđi ovddasteaddjiiguin Helssegis
Sámedikki delegašuvdna deaivvadii dán vahkus ságajođiheaddjiid jođihemiin stáhtaráđi ovddasteaddjiid ságastallan dihte ráđđehusprográmma sisdoalus sápmelaččaid oasil. Orpo ráđđehus lea iežas ráđđehusprográmmas čatnasan gárgehit ovddideaddji ságastallama ja ovttasbarggu sápmelaččaiguin. Ulbmilin lea ollašuhttit deaivvademiid buot ministariiguin dalán ráđđehusbaji álggus.
Govat: Sámediggi / Niina Siivikko.
Vahku áigge Sámedikki delegašuvdna deaivvadii olgoriikkaministtar Elina Valtosa (olgešb.), sosiáladorvoministtar Sanni Grahn-Laasosa (olgešb.), vuoigatvuođaministtar Leena Meri (VS) ja stáhtačálli Risto Artjoki (olgešb.). Sierra deaivvademiin ságastallojuvvui ee. sámediggelága ođadeamis, sápmelaččaid ovddastusas Eurohpá uniovnnas ja sápmelaččain sosiáladorvoođastusas. Lassin gieđahallojuvvui ovdamearkka dihte boazodolliid sadjásašveahkkevuogádaga hástalusat ja Deanu dilli.
– Ságastalaimet deaivvademiin ollu maiddái ráđđádallangeatnegasvuođa ollašuvvamis sámediggelága 9 § mielde sierra ministeriijain, muitala ságajođiheaddji Tuomas Aslak Juuso.
Buori ovttasbarggu lea dehálaš álggahit dalán
Sámediggi sávvá, ahte deaivvadeamit buot ministariiguin ordnašuvvet farggamusat.
– Lea dehálaš, ahte ministarat gávdnet dáidda deaivvademiide áiggi iežaset dievas kaleandariin, galhan sápmelaččaid áššit gullet measta juohke ministara suorgái muhtun láhkai, gávnnaha ságajođiheaddji Juuso. – Mii leat maiddái bovden ministariid Anárii oahpásnuvvat báikki alde sámekultuvrii ja Sámedikki bargui, ja dat galledeamit leatge juo boahtimin, Juuso joatká.
Stáhtaráđi deaivvademiid lassin Sámedikki ovddasteaddjit oassálaste ovdamearkka dihte ráđđádallamiidda boazovahátlága doaibmabijuin sámediggelága 9 § mielde eana- ja meahccedoalloministeriijas. Delegašuvdnii vahku áigge gulle ságajođiheaddji Tuomas Aslak Juuso, I várreságajođiheaddji Anni Koivisto, II várreságajođiheaddji Leo Aikio, ealáhus- ja vuoigatvuođalávdegotti ságadoalli Asko Länsman, láhkačálli Kalle Varis, ealáhus- ja birasláhkačálli Sarita Kämäräinen, sosiála- ja dearvvasvuođačálli Kaisa Ruokojärvi ja ságajođiheaddji veahkkebargi Niina Siivikko.
Lassedieđut:
Tuomas Aslak Juuso
Ságajođiheaddji
040 687 3394
tuomas.juuso@samediggi.fi
