Sääʹmteʹǧǧ vuõiʹni riikksuåvtõõzz eeʹttǩeeʹjid Heʹlssnest
Sääʹmteeʹǧǧ delegaatio vuõiʹni tän neäʹttlest saaǥǥjååʹđteeikååʹdd jååʹđtummšen riikksuåvtõõzz eeʹttǩeeʹjid saǥstõõllâm diõtt halltõsprograamm siiskõõzzâst säʹmmlai beäʹlnn. Orpo halltõs lij halltõsprograammâst čõnnõõttâm viikkâd ooudâs raajji vuârrsaakkeem da õhttsažtuâj säʹmmlaivuiʹm. Täävtõssân lij, što kaaunõõttmõõžž puki ministeeʹrivuiʹm vuäǯǯat teâuddjõttum tâʹlles halltõspââʹj alggpââʹjest.
Snimldõõǥǥ: Sääʹmteʹǧǧ / Niina Siivikko.
Neäʹttel poodd Sääʹmteeʹǧǧ delegaatio vuõiʹni ålggminister Elina Valtonen (kok), sosiaalstaanminister Sanni Grahn-Laasonen (kok), vuõiggâdvuõttminister Leena Mere (PS) di riikkpiisar Risto Artjoki (kok). Jeeʹres kaaunõõttmõõžžin saǥstõʹlleš jm. sääʹmteʹǧǧlääʹjj oođummšest, säʹmmlai eeʹttkâsttmõõžžâst Euroopp unioonâst di sääʹm sosiaalstaanoođummšest. Lââʹssen ǩiõttʼtõʹlleš ouddmiârkkân puäʒʒhoiʹddjeeʹji sâjjsažveäʹǩǩriâžldõõǥǥ vaʹǯǯtõõzzin di Teän vueʹjjest.
– Jiõʹlim kaaunõõttmõõžžin vââʹlljest saǥstõõllmõõžž še sääʹmteʹǧǧlääʹjj 9 § meâldlaž saǥstõõllâmõõlǥtõõzz teâuddjummšest jeeʹres ministeriain, särnn saaǥǥjååʹđteeʹjj Tuomas Aslak Juuso.
Pueʹrr õhttsažtuâjj lij vääžnai jåttʼted tâʹlles
Sääʹmteʹǧǧ tuäivv, što kaaunõõttmõõžž puki ministeeʹrivuiʹm jäʹrjstâʹvve âʹlddääiʹj poodd.
– Lij vääžnai, što ministeeʹr käuʹnne täid kaaunõõttmõõžžid ääiʹj ǩirrsaž kalendeeʹrin, koʹlle tâma säʹmmlai ääʹšš miâlggâd juõʹǩǩ ministeeʹr suârgga naaʹlin leʹbe nuuʹbbin, tuâtt saaǥǥjååʹđteeʹjj Juuso. – Leäʹp še kåččam ministeeʹrid Aanra tobdstõõttâd pääiʹǩ ool sääʹmkulttuur da Sääʹmteeʹǧǧest tuejjeem tuõjju, da täk kuõʹssjempoodd liâ juʹn teâđast pueʹttmen, Juuso juätkk.
Riikksuåvtõõzz kaaunõõttmõõžži lââʹssen Sääʹmteeʹǧǧ eeʹttǩeeʹj vuässõʹtte sääʹmteʹǧǧlääʹjj 9 § meâldlaž saǥstõõllmõõžžid ouddmiârkkân mädd- da meäʹcctäällministeriast puäʒʒskääđlääʹjj tiuʹdde piijjmõʹšše kuõskeeʹl. Delegaatiost mieʹldd leʹjje neäʹttel poodd saaǥǥjååʹđteeʹjj Tuomas Aslak Juuso, I väärrsaaǥǥjååʹđteeʹjj Anni Koivisto, II väärrsaaǥǥjååʹđteeʹjj Leo Aikio, jieʹllemvueʹǩǩ- da vuõiggâdvuõttluʹvddkååʹdd saaǥǥjååʹđteeʹjj Asko Länsman, lääʹǩǩpiisar Kalle Varis, jieʹllemvueʹǩǩ- da pirrõslääʹǩǩpiisar Sarita Kämäräinen, sosiaal- da tiõrvâsvuõttpiisar Kaisa Ruokojärvi di saaǥǥjååʹđteeʹj vieʹǩǩteeʹjj Niina Siivikko.
Lââʹssteâđ:
Tuomas Aslak juuso
Saaǥǥjååʹđteeʹjj
040 687 3394
tuomas.juuso@samediggi.fi
