Sämitigge teivâdij staatârääđi ovdâsteijeid Helsigist
Sämitige delegaatio teivâdij moonnâm ohhoost 25.-27.10. saavâjođetteijee Tuomas Aslak Juuso jođettâsâst staatârääđi ovdâsteijeid Helsigist. Teivâdmij ulmen lâi ovdediđ pyeri savâstâllâm já oovtâstpargo haldâttâs já sämmilij kooskâst Orpo haldâttâsohjelm čonâdâtmij miäldásávt.
Pirâs- já šoŋŋâdâhminister Kai Mykkänen já saavâjođetteijee Tuomas Aslak Juuso.
Oho ääigi Sämitige delegaatio teivâdij staatârääđi ovdâsteijein pirâs- já šoŋŋâdâhminister Kai Mykkäsii (kok), piäluštâsminister Antti Häkkäsii (kok) sehe pargominister Arto Satosii (kok). Teivâdmij fáddán lijjii ovdâmerkkân EU biodiversiteetsopâmuš aalmuglâš olášuttem, Suomâ NATO-jeessânvuođâ vaikuttâsah sämmilij päikkikuávlust sehe sämikielâlij pargei finnim visásmittem eromâšávt suorgijn, main lii vááijuvvuotâ pargovyeimist.
– Mist lijjii pyereh savâstâlmeh maaŋgâlágánijn sämmiláid kyeskee äššiolesvuođâin. Mij suogârdâlâim oovtâst ovdâmerkkân vuovijd pyerediđ sämikielâlij viärjukenigâsâi palvâlusâid sehe tom, maht sämmilij uásálâšvuotâ váldoo huámmášumán pargolâšvuotâtooimâi uđâsmitmijn, ovdâmerkkân ko vuávájuvvojeh mekanismeh rävisolmoošškovlimtorjuu sajan, muštâl saavâjođetteijee Tuomas Aslak Juuso.
Teivâdmist jotolâh- já viestâdemminister (Lulu Ranne, PS) staatâčällee Marjo Lindgrenijn savâstâllâmfáddán lijjii ei. maađijviärmáduv já viestâdemohtâvuođâi oornig sämmilij päikkikuávlust, tego ovdâmerkkân maađijohtâvuođah Aanaar-Pokka já Aanaar-Čevetjävri kooskâst sehe maađijviärmádâh Ucjuv já Kilbisjäävri kuávluin. Olgoeennâmkävppi- já ovdedemminister (Ville Tavio, PS) sierânâsišedeijee Tuomas Tähtijn savâstâllii eromâšávt algâaalmugijn Suomâ ovdedempolitiikist. Delegaatio teivâdij meid mm. riehtiminister (Leena Meri, PS) staatâčällee Teija Makkosii sämitiggelaavâ uđâsmittem äigitaavlui háárán. Toos lasseen Sämitige ovdâsteijeeh teivâdii virgeolmooštääsist sosiaal- já tiervâsvuođâminister (Kaisa Juuso, PS) sierânâsišedeijee Hannu Peurasaari, kiäin savâstâllii ei. sämikielâlij já kulttuurmiäldásij soti-palvâlusâi finnim turviimist eromâšávt sämikielâlij mielâtiervâsvuođâpalvâlusâi uásild.
– Mij kaavnâim teivâdmijn ohtsii táttutile maaŋgâ ääši ovdedem várás ovdâmerkkân jotolâh- já viestâdemministeriöin. Mun tuáivum-uv, ete pyereest álgám oovtâstpargo juátkoo meid puátteevuođâst já mij kavnâp ohtsijd čuávdusijd maaŋgâin sämmiláid kyeskee aašijn, paahud Juuso.
Sämitige delegaation oho ääigi kullii saavâjođetteijee Tuomas Aslak Juuso, lahâčällee Kalle Varis, iäláttâs- já pirâslahâčällee Sarita Kämäräinen, vs. pirâsčällee Tiina Lovisa Solbär, kielâtorvočällee Anne Kirste Aikio, sosiaal- já tiervâsvuođâčällee Anne Länsman-Magga sehe saavâjođetteijee išedeijee Niina Siivikko. Toos lasseen káidusohtâvuođáin uásálistijn aalmugijkoskâsij aašij čällee Inka Saara Arttijeff sehe sosiaal- já tiervâsvuođâčällee Kaisa Ruokojärvi.
Lasetiäđuh:
Tuomas Aslak Juuso
Saavâjođetteijee
040 687 3394
tuomas.juuso@samediggi.fi
